शिवसेना पक्ष आणि ‘धनुष्यबाण’ चिन्हाचा अंतिम निकाल कधी लागणार? असीम सरोदेंनी सांगितला संभाव्य कालावधी
मुंबई : शिवसेना पक्ष आणि ‘धनुष्यबाण’ चिन्हाच्या वादावर सर्वोच्च
न्यायालयाचा अंतिम निकाल कधी लागणार, याकडे महाराष्ट्राचे लक्ष लागले आहे. या प्रकरणातील
सुनावणी निर्णायक टप्प्यात पोहोचली असून, उद्धव ठाकरे
गटाच्या वतीने ज्येष्ठ वकील कपिल सिब्बल यांनी आपला युक्तिवाद मांडला आहे. सुनावणीदरम्यान
शिवसेना पक्ष, आमदारांची अपात्रता आणि ‘धनुष्यबाण’ चिन्हाशी
संबंधित विविध कायदेशीर मुद्दे न्यायालयासमोर मांडण्यात आले. आता पुढील टप्प्यात
एकनाथ शिंदे यांच्या बाजूने युक्तिवाद केला जाणार आहे. त्यामुळे या प्रकरणाकडे
राजकीय वर्तुळाचेही लक्ष लागले आहे.
शिंदे गटाकडून ज्येष्ठ वकीलांची फौज
कायदेतज्ज्ञ असीम सरोदे यांनी सोशल मीडियावर केलेल्या पोस्टमध्ये
शिंदे गटाच्या वतीने अनेक ज्येष्ठ वकील युक्तिवाद करणार असल्याचे म्हटले आहे. नीरज
किशन कौल हे मुख्यतः बाजू मांडतील, तर मुकुल रोहतगी, मनिंदर सिंग,
महेश जेठमलानी आणि हरीश साळवे हेही युक्तिवादासाठी उपस्थित
राहण्याची शक्यता असल्याचे सरोदे यांनी नमूद केले आहे. उद्धव ठाकरे यांच्या बाजूने
ज्येष्ठ वकील कपिल सिब्बल यांनी युक्तिवाद केला असून, असीम
सरोदे हेही ठाकरे गटाच्या बाजूने सहाय्यक म्हणून न्यायालयीन प्रक्रियेत सहभागी
असल्याचे त्यांनी सांगितले आहे.
सप्टेंबरअखेर किंवा ऑक्टोबरमध्ये मोठ्या घडामोडी?
शिवसेना सत्तासंघर्षाच्या निकालाबाबत असीम सरोदे यांनी संभाव्य
कालावधीचा अंदाज व्यक्त केला आहे. न्यायालयीन निर्णयानंतर त्याची अंमलबजावणी आणि
पुढील प्रक्रिया पूर्ण होण्यासाठी काही आठवडे लागू शकतात, असे
गृहीत धरून त्यांनी सप्टेंबरच्या अखेरीस किंवा ऑक्टोबरमध्ये महाराष्ट्राच्या
राजकारणात मोठ्या घडामोडी होण्याची शक्यता व्यक्त केली आहे. मात्र, हा असीम सरोदे यांचा अंदाज असून सर्वोच्च न्यायालयाच्या निकालाची
अधिकृत तारीख अद्याप निश्चित झालेली नाही.
शिवसेना पक्षावर दावा, ‘धनुष्यबाण’ चिन्ह आणि सत्तासंघर्षाशी संबंधित
कायदेशीर वादाचा अंतिम निकाल महाराष्ट्राच्या राजकारणावर मोठा परिणाम करणारा
ठरण्याची शक्यता आहे. त्यामुळे सर्वोच्च न्यायालयाच्या निर्णयाकडे आता राजकीय
पक्षांसह संपूर्ण राज्याचे लक्ष लागले आहे.
Warning: Undefined variable $AdImage in /home/dailysanchar/public_html/NewsDetails.php on line 216