तरुणाचे ३६ वर्षीय विवाहितेसोबत प्रेमसंबंध; वादातून हाणामारी, भाच्याला वाचवताना मामाचा मृत्यू

तरुणाचे ३६ वर्षीय विवाहितेसोबत प्रेमसंबंध; वादातून हाणामारी, भाच्याला वाचवताना मामाचा मृत्यू

सोलापूर : शहरातील लोकमान्य नगर परिसरात कथित प्रेमसंबंधातून झालेल्या वादाला हिंसक वळण लागले. २२ वर्षीय तरुणाचे ३६ वर्षीय विवाहित महिलेसोबत कथित प्रेमसंबंध असल्याच्या संशयातून झालेल्या हाणामारीत ४५ वर्षीय व्यक्तीचा मृत्यू झाला. भाच्याला मारहाण होत असताना त्याला वाचवण्यासाठी गेलेल्या मामाच्या छातीत जोरदार मारहाण झाल्याने त्यांचा मृत्यू झाल्याचे समोर आले आहे. या घटनेप्रकरणी विजापूर नाका पोलीस ठाण्यात चौघांविरोधात खुनाचा गुन्हा दाखल करण्यात आला आहे. मृत व्यक्तीचे नाव अल्ताफ बाशा शेख (वय ४५) असे आहे. तर गंभीर जखमी झालेल्या सुफीयान इर्शाद शेख (वय २२) याच्या फिर्यादीवरून पोलिसांनी गुन्हा नोंदवला आहे.

प्रेमसंबंधाच्या संशयातून वाद

पोलिसांच्या माहितीनुसार, सुफीयान शेख याचे एका ३६ वर्षीय विवाहित महिलेसोबत कथित प्रेमसंबंध होते. या संबंधाची माहिती महिलेचा पती मतीन गजनफर शेख याला मिळाल्याचा आरोप आहे. त्यानंतर पती-पत्नीमध्ये या कारणावरून वारंवार वाद होत असल्याचे सांगण्यात आले. रविवारी सायंकाळी सुफीयान शेख हा संबंधित महिलेच्या घरी गेला असताना मतीन शेख तेथे आला. सुफीयानला घरात पाहिल्यानंतर दोघांमध्ये जोरदार वाद झाला.

नातेवाईकांना बोलावून मारहाण केल्याचा आरोप

या वादानंतर मतीन शेख याने पत्नीचा भाऊ सद्दाम इनामदार याला फोन करून बोलावून घेतल्याचे सांगण्यात येते. सद्दाम हा लोखंडी रॉड आणि रबरी पाइप घेऊन मुशेब सय्यद आणि शोएब सय्यद यांच्यासह घटनास्थळी आल्याचा आरोप आहे. यानंतर सुफीयानला घराबाहेर काढून त्याला मारहाण करण्यात आल्याचे फिर्यादीत नमूद करण्यात आले आहे.

भाच्याला वाचवताना मामावरही हल्ला

सुफीयानला मारहाण होत असताना त्याचा मामा अल्ताफ शेख याने भाच्याला मारहाण करू नका, अशी विनंती केल्याचे सांगण्यात येते. मात्र, आरोपींनी सुफीयानसोबत अल्ताफ शेख यांनाही मारहाण केल्याचा आरोप आहे. अल्ताफ शेख यांच्या छातीत लाथाबुक्क्यांनी जोरदार मारहाण करण्यात आली. तर सुफीयानच्या डोक्यात लोखंडी पाइपने मारल्याने तो गंभीर जखमी झाला.

उपचारापूर्वीच मृत्यू

मारहाणीदरम्यान अल्ताफ शेख हे जागेवरच कोसळले. नातेवाईकांनी त्यांना तातडीने खासगी रुग्णालयात दाखल केले. मात्र, डॉक्टरांनी तपासल्यानंतर त्यांना मृत घोषित केले. या घटनेनंतर परिसरात खळबळ उडाली असून विजापूर नाका पोलिसांनी प्रकरणाचा तपास सुरू केला आहे.

चौघांविरोधात खुनाचा गुन्हा

या प्रकरणी मतीन गजनफर शेख, सद्दाम इनामदार, मुशेब सय्यद आणि शोएब सय्यद या चौघांविरोधात खुनाचा गुन्हा दाखल करण्यात आला आहे. गंभीर जखमी सुफीयान शेख याच्यावर उपचार सुरू असल्याची माहिती आहे. कथित प्रेमसंबंधातून सुरू झालेला वाद थेट जीवघेण्या हाणामारीपर्यंत पोहोचल्याने सोलापुरात या घटनेची चर्चा सुरू आहे. या प्रकरणातील नेमकी कारणे आणि हल्ल्याची संपूर्ण पार्श्वभूमी पोलीस तपासातून स्पष्ट होणार आहे.