आभाळ कोसळलंय...! नेपाळमधील महापुराने हाहाकार; २० अब्ज रुपयांचा निधी, भारतातील नेपाळींनाही मदतीचे आवाहन
काठमांडू : नेपाळमध्ये महापूर आणि भूस्खलनामुळे निर्माण झालेल्या भीषण परिस्थितीनंतर
सरकारने मदत आणि पुनर्वसनाच्या कामांना वेग दिला आहे. पूरग्रस्त भागातील
नागरिकांना तातडीची मदत देण्यासाठी नेपाळ सरकारने २० अब्ज नेपाळी रुपयांचा निधी उभारण्याचा निर्णय घेतला आहे. या निधीतून
बचावकार्य, अन्न, निवारा आणि वैद्यकीय मदत यांसारख्या
तातडीच्या गरजा पूर्ण केल्या जाणार आहेत.
मदत आणि बचावासाठी २० अब्ज रुपयांची तरतूद
महापुरामुळे मोठ्या प्रमाणात मनुष्यहानी आणि
वित्तहानी झाली असून, परिस्थिती नियंत्रणात आणण्यासाठी सरकारकडून
युद्धपातळीवर प्रयत्न सुरू आहेत. नेपाळ सरकारकडून पंतप्रधान आपत्ती निवारण
निधी, गृह मंत्रालय आणि इतर राखीव आर्थिक स्रोतांमधून आवश्यकतेनुसार २० अब्ज नेपाळी रुपये उपलब्ध करून दिले जाणार आहेत. या निधीचा वापर पूरग्रस्त नागरिकांना तातडीने मदत करण्यासाठी केला जाणार
आहे.
जागतिक बँकेकडून आणखी २५ अब्ज रुपयांची मदत?
महापुरामुळे नुकसान झालेल्या पायाभूत
सुविधांच्या पुनर्बांधणीसाठी नेपाळ सरकारकडून जागतिक बँकेकडून सुमारे २५ अब्ज नेपाळी रुपयांची आर्थिक मदत मिळवण्याची तयारी सुरू आहे. या निधीतून पूर आणि भूस्खलनामुळे नुकसान
झालेले रस्ते, पूल, जलविद्युत प्रकल्प आणि इतर महत्त्वाच्या
पायाभूत सुविधांची पुनर्बांधणी करण्यावर भर दिला जाणार आहे.
भारतातील नेपाळी नागरिकांनाही मदतीचे आवाहन
दरम्यान, या नैसर्गिक आपत्तीच्या पार्श्वभूमीवर नवी
दिल्लीतील नेपाळच्या दूतावासाने भारतात वास्तव्यास असलेल्या नेपाळी नागरिकांना आणि
विविध नेपाळी संस्थांना मदतीचा हात पुढे करण्याचे आवाहन केले आहे. पूरग्रस्तांसाठी असलेल्या पंतप्रधान आपत्ती निवारण निधी आणि पंतप्रधान
मदत निधीत आर्थिक योगदान देण्याची विनंती करण्यात आली आहे. मदत करू इच्छिणाऱ्या नागरिकांसाठी दूतावासाकडून अधिकृत
बँक खात्यांची माहिती उपलब्ध करून देण्यात आल्याचे सांगण्यात आले आहे.
पुनर्वसन आणि पुनर्बांधणीला प्राधान्य
महापुरामुळे झालेल्या मनुष्यहानी आणि आर्थिक
नुकसानीचा सविस्तर आढावा घेतला जात आहे. पूरग्रस्त नागरिकांना तात्पुरता निवारा, अन्नधान्य आणि वैद्यकीय सुविधा उपलब्ध करून देण्याबरोबरच बेघर झालेल्या
नागरिकांचे पुनर्वसन करण्याचे आव्हान सरकारसमोर आहे. दुर्गम हिमालयीन भागात लष्कर, पोलीस आणि स्थानिक प्रशासनाच्या माध्यमातून
शोध आणि बचावकार्य सुरू आहे.
रस्ते, पूल आणि वीज प्रकल्पांची मोठी हानी
महापुरामुळे अनेक भागांतील रस्ते आणि पूल
वाहून गेल्याने दळणवळणावर परिणाम झाला आहे. काही जलविद्युत प्रकल्प आणि वीज
पायाभूत सुविधांचेही नुकसान झाले आहे. त्यामुळे नेपाळसमोर आता केवळ तातडीच्या
मदतकार्याचेच नव्हे, तर मोठ्या प्रमाणावर पुनर्वसन आणि पायाभूत सुविधांच्या पुनर्बांधणीचे आव्हान उभे राहिले आहे.
