विदर्भात पुढील २४ तास अतिमुसळधार पावसाचा इशारा; अमरावती, यवतमाळला रेड अलर्ट
महाराष्ट्रात मान्सून पुन्हा सक्रिय झाला असून पुढील २४
तासांत विदर्भातील काही भागांत मुसळधार ते अतिमुसळधार पावसाची शक्यता भारतीय
हवामान विभागाने वर्तवली आहे. संभाव्य अतिवृष्टीच्या पार्श्वभूमीवर काही
जिल्ह्यांसाठी सतर्कतेचा इशारा जारी करण्यात आला आहे. हवामान विभागाने अमरावती आणि
यवतमाळ या जिल्ह्यांना रेड अलर्ट जारी केला असून नागरिकांनी विशेष खबरदारी घ्यावी, असे आवाहन केले आहे. तसेच अकोला, नागपूर आणि
चंद्रपूर जिल्ह्यांसाठी ऑरेंज अलर्ट घोषित करण्यात आला आहे.
या भागांमध्ये काही ठिकाणी अतिवृष्टी होण्याची शक्यता असून काही ठिकाणी सुमारे २०० मिलिमीटरपर्यंत पावसाची नोंद होऊ शकते, असा अंदाज व्यक्त करण्यात आला आहे. दरम्यान, राज्यातील इतर जिल्ह्यांसाठी सध्या कोणताही विशेष इशारा देण्यात आलेला नाही. हवामान विभागाने नागरिकांनी अधिकृत सूचनांचे पालन करावे, अनावश्यक प्रवास टाळावा आणि गरज नसल्यास घराबाहेर पडू नये, असे आवाहन केले आहे.
