"पुण्यात पुन्हा गोळीबार – कोथरूडमध्ये टोळीयुद्ध, प्रकाश धुमाळ गंभीर जखमी; निलेश घायवळ टोळीवर संशय"

पुणे | १८ सप्टेंबर २०२५
पुणे गुन्हेगारीने पुन्हा डोकं वर काढलं आहे. नाना पेठेतील आयुष कोमकर हत्येची घटना ताजी असतानाच बुधवारी रात्री कोथरूड परिसरात पुन्हा गोळीबार झाला. या हल्ल्यात प्रकाश धुमाळ हा तरुण गंभीर जखमी झाला असून, त्याच्यावर खासगी रुग्णालयात उपचार सुरू आहेत.

गोळीबाराची माहिती
कोथरूडमधील निलेश घायवळ टोळीशी संबंधित सराइत गुंडांनी हा हल्ला केल्याचे प्राथमिक तपासात समोर आले आहे. मुसा शेख, रोहित आखाडे, गणेश राऊत आणि मयूर कुंभारे या चौघांवर गुन्हा दाखल करण्यात आला आहे.

• हल्लेखोरांनी धुमाळवर पिस्तुलातून ३ गोळ्या झाडल्या.
• एक गोळी मानेला चाटून गेली, तर दोन गोळ्या मांडीत शिरल्या.
• घटनेमागे पूर्ववैमनस्य असल्याची शक्यता पोलिसांनी व्यक्त केली आहे.

पोलिसांची कारवाई
घटनेनंतर कोथरूड पोलिसांनी घटनास्थळी धाव घेतली. परिमंडळ ३ चे पोलीस उपायुक्त संभाजी कदम आणि कोथरूड पोलिस ठाण्याचे वरिष्ठ निरीक्षक संदीप देशमाने यांनी घटनास्थळी भेट देऊन पाहणी केली. आरोपी चौघे सध्या पसार असून, त्यांचा शोध सुरू आहे.

गँगवारची पार्श्वभूमी
कोथरूड परिसरात गजानन उर्फ गज्या मारणे आणि निलेश घायवळ टोळी यांच्यात वैमनस्य आहे. अलीकडेच श्री शिवजयंतीनिमित्त एका संगणक अभियंत्याला मारहाण केल्याप्रकरणी गज्या मारणे टोळीवर मकोका कारवाई झाली होती. त्याचप्रमाणे निलेश घायवळवरही महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्यात आली होती.