संजय राऊत पुन्हा मैदानात; दोन महिन्यांच्या अंतरानंतर पुढील आठवड्यात माध्यमांशी संवाद

ठाकरे गटाचे प्रमुख नेते आणि नेहमीच आक्रमक भाषेत सरकारवर निशाणा साधणारे संजय राऊत यांनी प्रकृतीच्या कारणास्तव मागील दोन महिन्यांपासून माध्यमांपासून दूर राहण्याचा निर्णय घेतला होता. या काळात ते राजकीय बैठकांपासून आणि नियमित माध्यम संपर्कातून दूर होते. मात्र, ठाकरे सेनेच्या मुखपत्रातून त्यांनी सरकारवर टीका करण्याचा सुर कायम ठेवला होता. आजारी असतानाही त्यांनी शिवसेनाप्रमुख बाळासाहेब ठाकरे यांच्या स्मृतीदिनी अभिवादन करण्यासाठी हजेरी लावली. यामुळे ते पुन्हा सक्रिय होणार असल्याचे संकेत आधीच मिळाले होते. आता मिळालेल्या माहितीनुसार, पुढील आठवड्यात सोमवारी सकाळी १० वाजता संजय राऊत माध्यमांशी संवाद साधणार आहेत. त्यांच्या या पुनरागमनाला राजकीयदृष्ट्या मोठे महत्त्व दिले जात आहे, कारण ते ठाकरे गटाचे “तोफ” म्हणून ओळखले जातात आणि त्यांची भाषणे, टीका आणि मुद्देसूद भूमिका नेहमीच चर्चेत राहतात.

उद्धव ठाकरे यांची राऊतांना भेट

काही दिवसांपूर्वीच ठाकरे गटाचे पक्षप्रमुख उद्धव ठाकरे यांनी संजय राऊतांच्या निवासस्थानी भेट घेतली. आगामी निवडणुकांतील रणनीती आणि राजकीय समीकरणांवर या बैठकीत चर्चा झाल्याची शक्यता व्यक्त केली जात आहे.

महापालिका निवडणुकांची पार्श्वभूमी

काही दिवसांवर महापालिका निवडणुका आल्या आहेत. त्यात:

• निवडणूक प्रचारातील आरोप-प्रत्यारोप
• महायुतीमधील असंतोष
• ठाकरे गट–मनसे संभाव्य युती
• मतदार यादीतील घोळ

असे अनेक मुद्दे चांगलेच चर्चेत आहेत. अशा परिस्थितीत संजय राऊत पुन्हा एकदा अॅक्टिव्ह मोडमध्ये येणार असल्याने त्यांची भूमिका राजकीय वातावरणात नव्या चर्चांना सुरुवात करणार हे स्पष्ट आहे.