मनसेचे राज्य सरचिटणीस वैभव खेडेकर भाजपमध्ये जाण्याची चर्चा; गणेशोत्सवानंतर प्रवेशाची शक्यता

कोकणातील स्थानिक स्वराज्य संस्थांच्या निवडणुकांपूर्वी राजकीय समीकरणं झपाट्याने बदलू लागली आहेत. भाजपने कोकणात मोर्चेबांधणी वेगाने सुरू केली असून, नुकताच चिपळूणचे उद्योजक प्रशांत यादव यांनी पक्षप्रवेश केला आहे. आता मनसेचे राज्य सरचिटणीस आणि कोकणातील प्रमुख नेते वैभव खेडेकर यांच्या भाजप प्रवेशाची चर्चा राजकीय वर्तुळात गाजत आहे.

काय घडू शकतं?

निकटवर्तीय सूत्रांनुसार खेडेकर यांचा पक्षप्रवेश गणेशोत्सवानंतर (सप्टेंबर २०२५) होण्याची शक्यता आहे. भाजप प्रदेशाध्यक्ष रवींद्र चव्हाण आणि संपर्कमंत्री नितेश राणे यांच्याकडून त्यासाठी जोरदार प्रयत्न सुरू आहेत. अधिकृत घोषणा अद्याप झालेली नसली तरी “प्रवेश जवळपास निश्चित आहे” असं खेडेकर यांच्या कार्यकर्त्यांचं म्हणणं आहे.

वैभव खेडेकर – मनसेचा कोकणातील खंदा शिलेदार

खेडेकर हे राज ठाकरे यांचे गेल्या २० वर्षांपासूनचे विश्वासू सहकारी आहेत. त्यांनी २०१४ मध्ये दापोली-खेड-मंडणगड विधानसभा मतदारसंघातून निवडणूक लढवली होती. खेड नगरपरिषद निवडून आणण्यात त्यांचा मोलाचा वाटा असून ते नगराध्यक्षही राहिले आहेत. “आंदोलनातून भिडणारा कार्यकर्ता” म्हणून त्यांची प्रतिमा आहे.

भाजपची रणनीती?

भाजप कोकणात आक्रमक पद्धतीने स्थानिक नेत्यांना पक्षात घेत आहे. प्रशांत यादव यांच्या प्रवेशानंतर आता वैभव खेडेकर यांचा संभाव्य प्रवेश हा मनसेला कमकुवत करण्याचा डाव असल्याचं बोललं जात आहे. यापूर्वी त्यांना शिवसेनेकडूनही ऑफर मिळाली होती, मात्र चर्चा फळाला आली नव्हती.

नाराजीमुळे बदलाची शक्यता

खेडेकर गेल्या काही काळापासून मनसेतील अंतर्गत राजकारणामुळे नाराज असल्याच्या चर्चा आहेत. मात्र, त्यांनी या चर्चांबाबत स्पष्टपणे सांगितलं – “असं काही असेल, तर मी स्वतः पत्रकार परिषद घेऊन जाहीर करेन.”

मनसेला मोठा धक्का?

जर खेडेकर भाजपात दाखल झाले, तर रत्नागिरी जिल्ह्यात, विशेषतः खेड-दापोली भागात मनसेची ताकद कोलमडण्याची शक्यता आहे. युवा वर्गातील त्यांची लोकप्रियता आणि मजबूत संघटनामुळे मनसेला या भागात आधार मिळाला होता. त्यांच्या जाण्याने महायुतीला निवडणुकांत सरस फायदा होईल, असा अंदाज राजकीय वर्तुळात व्यक्त केला जात आहे.