मराठा आरक्षण मोर्चा वादात; गणेशोत्सवाच्या पार्श्वभूमीवर मुंबईत तणाव, सरकारकडून आंदोलन पुढे ढकलण्याची विनंती
मराठा आरक्षणाचा प्रश्न पुन्हा पेटला असून आंदोलनकर्ते
नेते मनोज जारंगे पाटील यांनी 27 ऑगस्टपासून मुंबईकडे मोर्चा घेऊन
जाण्याची घोषणा केली आहे. मात्र, याच काळात सुरू होणाऱ्या गणेशोत्सवामुळे
कायदा आणि सुव्यवस्थेचे मोठे आव्हान निर्माण होऊ शकते.
भाजप
प्रवक्ते केशव उपाध्ये यांची विनंती
भाजपचे मुख्य प्रवक्ते केशव उपाध्ये यांनी एक्सवर पोस्ट करत जारंगे
पाटलांना मोर्चा पुढे ढकलण्याचे आवाहन केले आहे.
“गणेशोत्सव हा महाराष्ट्राचा महोत्सव आहे. लाखो भक्त या काळात
मुंबईत दाखल होतात. पोलिसांवर मोठा ताण असतो. अशा वेळी मोर्चामुळे जनजीवन विस्कळीत
होऊ नये,” असे उपाध्ये म्हणाले.
त्यांनी पुढे स्पष्ट केले की, फडणवीस सरकार मराठा समाजाच्या आरक्षणासाठी कटिबद्ध आहे. “देवेंद्र फडणवीस
मुख्यमंत्री असताना आरक्षणाचा श्रीगणेशा झाला होता. उद्धव ठाकरे–शरद पवार
सरकारमुळे ते गमावले गेले, पण फडणवीस पुन्हा प्रयत्नशील आहेत,”
असे उपाध्ये म्हणाले.
मुख्यमंत्री
फडणवीस यांची प्रतिक्रिया
मुख्यमंत्री देवेंद्र फडणवीस यांनीही या आंदोलनावर भाष्य करत म्हटले
की,
“लोकशाहीत आंदोलन करण्याचा अधिकार आहे, मात्र
गणेशोत्सव हा महाराष्ट्राचा उत्सव आहे. त्यात कुणी विघ्न आणू नये. आंदोलकही यात
खोडा घालणार नाहीत, असा आम्हाला विश्वास आहे.”
फडणवीस यांनी पुढे सांगितले की, सरकारने मराठ्यांसाठी 10% आरक्षण, हॉस्टेल्स, उद्योजकतेसाठी मदत अशा योजना राबवल्या
असून 1.5 लाख उद्योजक तयार करण्यात आले आहेत.
मनोज
जारंगे यांच्या मुख्य मागण्या
- मराठा-कुणबी एकच
असल्याचा जीआर मंजूर करावा
- हैदराबाद गॅझेट व 58 लाख नोंदींची तात्काळ अंमलबजावणी
- 2012 च्या
कायद्यात दुरुस्ती करून ओबीसी अंतर्गत आरक्षण
मोर्च्याचा
मार्ग आणि वेळापत्रक
- 27 ऑगस्ट
: अंतरवाली सराटी → पैठण → शेवगाव → कल्याण फाटा → आळे फाटा → शिवनेरी मुक्काम
- 28 ऑगस्ट
: शिवनेरी → खेड → चाकण → लोणावळा → वाशी → चेंबूर → आझाद मैदान
- 29 ऑगस्ट
: सकाळी 10 वाजता आझाद मैदानावर आंदोलन
आणि बेमुदत उपोषण
मुंबई पोलिसांनी या आंदोलनासाठी 15,000 पेक्षा जास्त पोलीस, CRPF, क्राउड कंट्रोल उपाय अशी
तयारी केली आहे. विशेषतः लालबागचा राजा सारख्या प्रसिद्ध मंडळांजवळ गर्दी
वाढण्याची शक्यता असल्याने पोलिसांना विशेष सतर्कता ठेवावी लागणार आहे.
