आईच्या जन्मतारखेमुळे बदलले नशीब! केरळच्या अनिलकुमारने जिंकली तब्बल २४० कोटींची लॉटरी

केरळ : आई आणि मुलाचे नाते हे शब्दातीत असते. आईचे निस्वार्थी प्रेम आणि तिच्या आशीर्वादामुळेच मुलाचे आयुष्य उजळते. याच प्रेमाच्या नात्याने केरळमधील २९ वर्षीय अनिलकुमार बोल्ला याचे नशीब काही क्षणांत बदलून गेले. त्याने संयुक्त अरब अमिराती (UAE) मध्ये तब्बल १०० दशलक्ष दिर्‍हॅम (भारतीय चलनात सुमारे २४० कोटी रुपये) इतक्या भव्य लॉटरीचे बक्षीस जिंकले आहे.

‘लकी ड्रॉ’मध्ये सर्व अंक जुळले आणि नशीब उजळले —
'खलीज टाईम्स'च्या वृत्तानुसार, अबू धाबीमध्ये वास्तव्यास असलेला अनिलकुमार मागील काही वर्षांपासून लॉटरी खेळत होता. यावेळी त्याने एकाच वेळी १२ तिकिटे खरेदी केली होती. प्रत्येक तिकिटासाठी ५० दिर्‍हॅम (सुमारे ₹१,२८५) इतकी किंमत होती. लकी डे ड्रॉमध्ये त्याने 'इझी पिक' पर्याय वापरून ११ हा अंक निवडला — जो त्याच्या आईच्या जन्मतारखेचे प्रतीक होता. आणि या अंकामुळेच त्याचे आयुष्य बदलले.

“हो, मी जिंकलो आहे!” — आनंदाश्रूंचा क्षण
ड्रॉचे निकाल जाहीर होत असताना अनिलकुमार घरी आराम करत होता. तेव्हा यूएई लॉटरी टीमचा फोन आला. “मी सोफ्यावर बसलो होतो आणि मला जाणवत होतं की, हो, मीच जिंकलो आहे,” असे त्याने सांगितले. त्याला क्षणभर विश्वासच बसला नाही की त्याने २४० कोटी रुपयांचे बक्षीस जिंकले आहे.

पालकांची स्वप्ने पूर्ण करण्याचा निर्धार —
इतक्या मोठ्या रकमेच्या लॉटरीनंतर अनिलकुमारने सांगितले, “आता माझ्याकडे पैसा आहे. मला माझ्या पालकांची सर्व स्वप्ने पूर्ण करायची आहेत. त्यांना यूएईमध्ये आणून माझ्या सोबत राहायचे आहे. त्यांच्या छोट्या छोट्या इच्छा पूर्ण करणे हेच माझे ध्येय आहे.”

धर्मादाय संस्थांना दान करण्याचा मानस —
स्वतःच्या आणि कुटुंबाच्या स्वप्नांबरोबरच, अनिलकुमारने गरजू लोकांना मदत करण्यासाठी काही रक्कम धर्मादाय संस्थांना दान करण्याचा निर्णय घेतला आहे. “खरा आनंद इतरांना आनंद देण्यात आहे,” असे तो म्हणाला.

“प्रत्येक गोष्ट काहीतरी कारणास्तव घडते” —
अनिलकुमार म्हणतो, “मला विश्वास आहे की प्रत्येक गोष्ट काहीतरी कारणास्तवच घडते. प्रत्येक खेळाडूने आपले नशीब आजमावत राहावे, कारण एक दिवस ते नक्कीच तुमच्याकडे येईल.”