"जीएसटी क्रांती : दोनच दर ५% आणि १८% – विम्याला करसूट, सिमेंटवर १८% कर; दैनंदिन वस्तू, शेतीसाहित्य, वाहनं आणि फुटवेअर झाले स्वस्त!"

नवी दिल्ली :- केंद्रीय अर्थमंत्री निर्मला सीतारामन यांनी आज जीएसटी परिषदेच्या ५६व्या बैठकीतील ऐतिहासिक निर्णय जाहीर केला. यामध्ये देशातील जीएसटी स्लॅबची रचना सोप्या पद्धतीने ५% आणि १८% इतकी करण्यात आली आहे. सध्याचे चार दर (५%, १२%, १८% आणि २८%) रद्द करून दोन दर ठेवले गेले आहेत. तंबाखू आणि अल्ट्रा-लक्झरी वस्तूंवर मात्र ४०% विशेष कर कायम ठेवला आहे.

महत्त्वाचे निर्णय

• विमा पॉलिसी : आरोग्य आणि जीवन विम्यावरील १८% जीएसटी रद्द; करमुक्त.
• सिमेंट : २८% वरून १८% जीएसटी.
• फुटवेअर : ₹२५०० पर्यंतचे बूट-चप्पल १२% ऐवजी ५%.
• वाहने :
• छोट्या पेट्रोल गाड्या (१२०० सीसी पर्यंत) – २८% वरून १८%.
• ई-व्हेईकल्स – फक्त ५%.
• बाईक (३५० सीसीपर्यंत) – २८% वरून १८%.
• लक्झरी गाड्या – ४०%.
• कृषी उपकरणे व ट्रॅक्टर – ५% जीएसटी.
• शिक्षणसाहित्य (वह्या, पेन्सिली, नकाशे, चार्ट्स) – करमुक्त.
• घरगुती उपकरणे (टीव्ही, एसी, वॉशिंग मशीन) – २८% वरून १८%.

ग्राहकांसाठी फायदे

• केसांचे तेल, शॅम्पू, साबण, टूथपेस्ट यांसारख्या दैनंदिन वस्तूंवर जीएसटी १८% वरून ५%.
• लोणी, तूप, चीज, दुग्धजन्य पदार्थ, ड्रायफ्रुट्स आता स्वस्त.
• पनीरवर कर पूर्णपणे रद्द.

शेतकऱ्यांसाठी दिलासा

• ट्रॅक्टर टायर, सिंचन उपकरणे, जैविक कीटकनाशके आता फक्त ५% जीएसटी.
• उत्पादन खर्च घटणार, शेतीस चालना मिळणार.

महसुली परिणाम

एसबीआय रिसर्चनुसार, या बदलांमुळे २०२५-२६ मध्ये राज्यांना १४.१० लाख कोटींचा महसूल मिळू शकतो. जरी काही राज्यांनी नुकसान होण्याची भीती व्यक्त केली, तरी सुलभ कररचना आणि वाढलेले अनुपालन महसूल वाढवेल असे अहवालात नमूद आहे.

सेवा क्षेत्राचा बूम

एचएसबीसी इंडियाच्या ताज्या सर्वेक्षणानुसार, सेवा क्षेत्राचा पीएमआय निर्देशांक ऑगस्टमध्ये १५ वर्षांच्या उच्चांकावर (६२.९) पोहोचला आहे. यामुळे रोजगार संधी वाढण्याची शक्यता आहे.