डायमंड लीग फायनल : नीरज चोप्राला उपविजेतेपदावर समाधान
भारताचा स्टार भालाफेकपटू आणि ऑलिम्पिक सुवर्णपदक विजेता नीरज चोप्रा याचे डायमंड लीग फायनल जिंकण्याचे स्वप्न पुन्हा एकदा अधुरे राहिले आहे. सलग तिसऱ्या वर्षी अंतिम फेरीत पोहोचलेल्या नीरजला उपविजेतेपदावर समाधान मानावे लागले. जर्मनीच्या ज्युलियन वेबरने ९१.५१ मीटरच्या आपल्या सर्वोत्तम थ्रोसह सुवर्णपदक पटकावले, तर नीरजने ८५.०१ मीटरच्या थ्रोसह रौप्यपदक निश्चित केले. नीरजने २०२२ मध्ये डायमंड लीग ट्रॉफी जिंकली होती, मात्र २०२३ आणि आता २०२५ मध्ये त्याला उपविजेतेपदावरच समाधान मानावे लागले आहे.
🔹 या हंगामातील नीरजची कामगिरी
डायमंड लीगच्या चारपैकी दोन पात्रता फेऱ्यांमध्ये सहभागी होऊनही
नीरजने चौथ्या स्थानी राहून अंतिम फेरी गाठली होती. याच हंगामात त्याने ९० मीटरचा
टप्पा ओलांडत नवा टप्पा गाठला होता. दोहा येथे झालेल्या स्पर्धेत त्याने ९०.२३
मीटर तर पॅरिसमध्ये ८८.१६ मीटरच्या भालाफेकीसह विजेतेपद पटकावले होते.
🔹 फायनलमधील चुरस
- पहिल्याच प्रयत्नात
वेबरने ९१.३७ मीटर भालाफेक करत नीरजवर दडपण आणले.
- नीरजने पहिल्या
प्रयत्नात ८४.३५ मीटर भाला फेकत तिसरे स्थान पटकावले.
- त्रिनिदाद आणि
टोबॅगोचा केशॉर्न वॉलकॉट ८४.९५ मीटरसह दुसऱ्या स्थानी होता.
- वेबरने दुसऱ्या
प्रयत्नात ९१.५१ मीटरची अप्रतिम भालाफेक केली, जी त्याच्या विजेतेपदासाठी पुरेशी
ठरली.
- दडपणाखाली असलेल्या
नीरजचे तीन सलग प्रयत्न (तिसरा, चौथा,
पाचवा) फाऊल ठरले.
- अखेर सहाव्या आणि
अंतिम प्रयत्नात नीरजने ८५.०१ मीटर भालाफेक करत दुसरे स्थान निश्चित केले.
🔹 अंतिम क्रमवारी
🥇 ज्युलियन वेबर (जर्मनी) – ९१.५१ मीटर
🥈 नीरज चोप्रा (भारत) – ८५.०१ मीटर
🥉 केशॉर्न वॉलकॉट (त्रिनिदाद आणि टोबॅगो) –
८४.९५ मीटर
