अहिल्यानगर : नेवासा फाट्यावर भीषण आग; फर्निचर दुकानासह घर जळून एका कुटुंबातील पाच जणांचा मृत्यू

अहिल्यानगर : नेवासा तालुक्यातील नेवासा फाटा येथे मयूर रासणे यांच्या फर्निचर दुकानाला लागलेल्या भीषण आगीत एकाच कुटुंबातील पाच जणांचा होरपळून मृत्यू झाला. या घटनेत दोन लहान मुलांचा देखील समावेश असून परिसरात हळहळ व्यक्त होत आहे.

मृतांची ओळख

• मयूर अरुण रासणे (४५ वर्षे)
• पायल मयूर रासणे (३८ वर्षे)
• अंश मयूर रासणे (१० वर्षे)
• चैतन्य मयूर रासणे (७ वर्षे)
• वृद्ध महिला (अंदाजे ७० वर्षे)

या आगीत यश किरण रासणे हा गंभीर जखमी झाला असून त्याच्यावर उपचार सुरू आहेत.

आग कशी लागली?

प्राथमिक माहितीनुसार, शॉर्ट सर्किटमुळे ही आग लागली असावी असा अंदाज वर्तवला जात आहे. मात्र अधिकृत पुष्टी अद्याप झालेली नाही. आगीचा वेग इतका प्रचंड होता की कुटुंबातील सदस्यांना बाहेर पडण्याची संधी मिळाली नाही.

स्थानिक व फायर ब्रिगेडची मदत

घटना घडल्यानंतर स्थानिक लोकांनी मदत करण्याचा प्रयत्न केला. परंतु आगीची तीव्रता पाहता काही करता आले नाही. अग्निशमन दलाच्या गाड्या घटनास्थळी पोहोचल्या आणि अनेक तासांच्या प्रयत्नांनंतर आग आटोक्यात आणली. परंतु तोपर्यंत मोठी हानी झाली होती.

शोककळा

या घटनेनंतर संपूर्ण नेवासा परिसरात शोककळा पसरली आहे. समाजातील अनेकांनी या दुर्घटनेत जीव गमावलेल्या कुटुंबासाठी श्रद्धांजली व्यक्त केली आहे.