गणेश विसर्जन स्थळांची महापौर-आयुक्तांकडून पाहणी; सुविधा आणि नियोजनाबाबत अधिकाऱ्यांना सूचना
सोलापूर : गणेशोत्सवाच्या पार्श्वभूमीवर गणेशमूर्ती विसर्जनासाठी महापालिका
प्रशासनाकडून करण्यात येणाऱ्या तयारीचा आढावा घेण्यासाठी महापौर विनायक
कोंड्याल आणि महापालिका आयुक्त सचिन ओंबासे यांनी शहरातील प्रमुख विसर्जन
स्थळांची पाहणी केली. यावेळी गणपती घाट विसर्जन कुंड, वैष्णव
घाट तसेच विजापूर रोड येथील धर्मवीर संभाजी महाराज तलावाची पाहणी करून तेथील
आवश्यक सुविधांचा आढावा घेण्यात आला. गणेशोत्सव काळात शहरात मोठ्या प्रमाणात
सार्वजनिक तसेच घरगुती गणेशमूर्तींचे विसर्जन केले जाते. त्यामुळे विसर्जन
स्थळांवर भाविक आणि गणेश मंडळांच्या कार्यकर्त्यांची मोठी गर्दी होत असते. या
पार्श्वभूमीवर नागरिकांना कोणतीही गैरसोय होऊ नये आणि विसर्जन प्रक्रिया सुरक्षित
व शिस्तबद्ध पद्धतीने पार पडावी, यासाठी महापालिका प्रशासनाने नियोजनाला सुरुवात केली
आहे.
स्वच्छता, प्रकाश आणि सुरक्षा व्यवस्थेचा आढावा
पाहणीदरम्यान महापौर आणि आयुक्तांनी विसर्जन स्थळांची प्रत्यक्ष पाहणी
करून स्वच्छता, प्रकाश व्यवस्था, पाणी व्यवस्था,
सुरक्षा व्यवस्था, वाहतूक नियोजन तसेच
गणेशमूर्ती विसर्जनासाठी आवश्यक सुविधांबाबत संबंधित
अधिकाऱ्यांकडून माहिती घेतली. विसर्जनासाठी मोठ्या प्रमाणात भाविक आणि गणेश
मंडळांचे कार्यकर्ते उपस्थित राहणार असल्याने गर्दीचे योग्य नियोजन करावे, अशा
सूचना यावेळी देण्यात आल्या.
विसर्जन स्थळी मनुष्यबळ वाढविण्याच्या सूचना
विसर्जनाच्या वेळी नागरिकांची तसेच गणेश मंडळांच्या कार्यकर्त्यांची
गैरसोय होऊ नये, यासाठी आवश्यक तेवढे मनुष्यबळ उपलब्ध ठेवावे,
असे निर्देश महापौर आणि आयुक्तांनी संबंधित अधिकाऱ्यांना दिले. विसर्जन
स्थळांवर पुरेसे स्वच्छता कर्मचारी नियुक्त करून परिसराची नियमित स्वच्छता राखावी.
तसेच रात्रीच्या वेळीही विसर्जन प्रक्रिया सुरळीत पार पडण्यासाठी पुरेशी प्रकाश
व्यवस्था करण्यात यावी, अशा सूचनाही देण्यात आल्या.
गणेशोत्सव काळात नागरिकांच्या सुरक्षिततेला प्राधान्य देत विसर्जन
स्थळांवर आवश्यक त्या सर्व सुविधा वेळेत उपलब्ध करून देण्याच्या दृष्टीने
महापालिका प्रशासनाकडून नियोजन करण्यात येत आहे.
पदाधिकारी व अधिकारी उपस्थित
यावेळी उपमहापौर ज्ञानेश्वरी देवकर, स्थायी
समिती सभापती रंजीता चाकोते, मध्यवर्ती गणेशोत्सव
महामंडळाचे ट्रस्टी अध्यक्ष श्रीशैल बनशेट्टी, लोकमान्य
मध्यवर्ती महामंडळाचे उत्सव अध्यक्ष बाळासाहेब गायकवाड, तसेच नरसिंग मेंगजी, महेश धाराशिवकर,
विजय पुकाळे, श्रीकांत घाडगे, सुनील रसाळे यांच्यासह महापालिका अधिकारी,
कर्मचारी आणि विविध गणेशोत्सव महामंडळांचे पदाधिकारी उपस्थित होते.
Warning: Undefined variable $AdImage in /home/dailysanchar/public_html/NewsDetails.php on line 216