महामार्गावर जॅक लावून लुटणारी आंतरजिल्हा टोळी जेरबंद; चार गुन्हे उघड, पाच लाखांचा मुद्देमाल जप्त
सोलापूर ग्रामीण पोलिसांनी महामार्गावर जॅक टाकून
वाहनांचे टायर पंक्चर करून प्रवाशांना लुटणाऱ्या आंतरजिल्हा टोळीचा पर्दाफाश करत
दोन आरोपींना अटक केली आहे. या कारवाईमुळे नातेपुते आणि मोहोळ पोलीस ठाण्यांच्या
हद्दीतील चार गंभीर गुन्ह्यांचा उलगडा झाला आहे. अटक करण्यात आलेल्या आरोपींकडून
सुमारे ₹5.08 लाख किमतीचे सोन्याचे दागिने, गुन्ह्यात वापरलेली मोटारसायकल आणि इतर साहित्य जप्त करण्यात आले
आहे.
पोलिसांनी दिलेल्या माहितीनुसार, आरोपी महामार्गावर रात्रीच्या वेळी जॅक किंवा धारदार वस्तू टाकून वाहनांचे
टायर पंक्चर करत. वाहनचालक थांबल्यानंतर त्यांना मारहाण करून सोन्याचे दागिने,
रोकड आणि इतर मौल्यवान वस्तू लुटत असत. या प्रकरणात अटक करण्यात
आलेल्या आरोपींची नावे सुहास विकास चौधरी (वय 32, रा.
येरमाळा, धाराशिव) आणि कृष्णा
उर्फ मोतीराम शिंदे (वय 28, रा. खामकरवाडी, धाराशिव) अशी आहेत. टोळीतील इतर पाच साथीदारांचा
शोध पोलीस घेत आहेत. ही कारवाई पोलीस निरीक्षक संजय जगताप यांच्या
मार्गदर्शनाखाली सहाय्यक पोलीस निरीक्षक भीमराव पाटील आणि त्यांच्या पथकाने
केली. पोलिसांनी नागरिकांना रात्रीच्या प्रवासादरम्यान संशयास्पद परिस्थिती
आढळल्यास तात्काळ पोलिसांशी संपर्क साधण्याचे आणि निर्जन ठिकाणी वाहन थांबवताना
विशेष दक्षता घेण्याचे आवाहन केले आहे.
