अमेरिकेने इराणचे मालवाहू जहाज जप्त केले; आखातात तणाव वाढला

इस्लामाबाद येथे प्रस्तावित अमेरिका-इराण चर्चेच्या काही तास आधीच मोठी घडामोड घडली आहे. अमेरिकन नौदलने इराणचे ‘तुस्का’ हे मालवाहू जहाज ताब्यात घेतल्याची माहिती समोर आली आहे.

काय घडले?

चीनहून इराणकडे जाणारे ‘तुस्का’ जहाज अमेरिकेच्या नौदल वेढ्याला चुकवून पुढे जाण्याचा प्रयत्न करत असल्याचा आरोप आहे. USS Spruance या अमेरिकन युद्धनौकेने ओमानच्या आखातात जहाजाला अडवत थांबण्याचे आदेश दिले. अमेरिकेचे राष्ट्राध्यक्ष डोनाल्ड ट्रम्प यांनी सांगितले की, वारंवार इशारे देऊनही जहाजाने आदेशांचे पालन केले नाही. त्यामुळे नौदलाने कारवाई करत जहाजाच्या इंजिन रूमला लक्ष्य करून ते थांबवले.

तपास सुरू

सध्या हे जहाज आणि त्यावरील कर्मचारी अमेरिकन मरीनच्या ताब्यात असून जहाजातील मालाची तपासणी सुरू आहे. या जहाजाचा यापूर्वीही बेकायदेशीर कारवायांशी संबंध असल्याचा दावा करण्यात आला आहे.

इराणचा तीव्र निषेध

या कारवाईवर इराणने तीव्र प्रतिक्रिया देत याला “आंतरराष्ट्रीय समुद्री चाचेगिरी” असे म्हटले आहे. अमेरिकेने विनाकारण शक्तीचा वापर केल्याचा आरोप इराणने केला आहे.

ड्रोन हल्ल्याचा प्रयत्न

माध्यमांच्या वृत्तानुसार, या घटनेनंतर एका इराणी ड्रोनने अमेरिकन युद्धनौकेवर हल्ला करण्याचा प्रयत्न केला, मात्र तो हाणून पाडण्यात आल्याचे सांगितले जात आहे.