महासाधना सप्ताहांतर्गत ‘कर्मयोगी’ प्रशिक्षण अनिवार्य; अतिरिक्त आयुक्त वीणा पवार यांचे निर्देश

सोलापूर : राज्य शासनाच्या ‘महासाधना सप्ताह’ उपक्रमांतर्गत सोलापूर महानगरपालिकेतील सर्व अधिकारी व कर्मचाऱ्यांनी ‘कर्मयोगी’ प्रशिक्षण पूर्ण करावे, असे निर्देश अतिरिक्त आयुक्त वीणा पवार यांनी दिले आहेत. भारत सरकार क्षमता विकास आयोग आणि कर्मयोगी भारत यांच्या संयुक्त विद्यमाने २ ते ८ एप्रिल दरम्यान ‘साधना सप्ताह’ राबविण्यात येत आहे. या अंतर्गत अधिकारी व कर्मचाऱ्यांना ‘iGOT कर्मयोगी’ या प्लॅटफॉर्मवर किमान चार तासांचे ऑनलाईन प्रशिक्षण देण्यात येणार आहे. या प्रशिक्षण कार्यक्रमाची सुरुवात २ एप्रिल रोजी इंद्रभुवन इमारतीतील सभागृहात आयोजित कार्यशाळेद्वारे करण्यात आली. यावेळी उपायुक्त सोनाली यादव, सहायक आयुक्त मनीषा मगर, गिरीश पंडित यांच्यासह विभागप्रमुख, अधिकारी व कर्मचारी उपस्थित होते. संगणक विभाग प्रमुख स्नेहल चपळगावकर यांनी ‘महासाधना सप्ताह’ आणि iGOT प्रणालीची नोंदणी व अभ्यासक्रमाबाबत सविस्तर तांत्रिक मार्गदर्शन केले. या उपक्रमाचा उद्देश शासकीय कर्मचाऱ्यांना बदलत्या तंत्रज्ञानाशी सुसंगत बनवणे, प्रशासन अधिक गतिमान व पारदर्शक करणे आणि नागरिकांना दर्जेदार सेवा देणे हा आहे. डिजिटल तंत्रज्ञान, ई-गव्हर्नन्स, संवाद कौशल्य आणि कार्यक्षमता वाढविण्यावर विशेष भर देण्यात येत आहे. अधिकारी व कर्मचाऱ्यांनी या उपक्रमात सक्रिय सहभाग घेऊन निर्धारित कालावधीत प्रशिक्षण पूर्ण करावे, असे आवाहन अतिरिक्त आयुक्त वीणा पवार यांनी केले.