अमेरिका–इस्रायल हल्ल्यात अयातुल्ला अली खामेनेई ठार; श्रीनगर ते लखनौ शिया समुदाय रस्त्यावर
इराणचे सर्वोच्च नेते अयातुल्ला अली खामेनेई यांच्या अमेरिका–इस्रायलच्या संयुक्त हवाई हल्ल्यात मृत्यू झाल्याची धक्कादायक माहिती समोर आली आहे. या घटनेनंतर मध्यपूर्वेत तणाव वाढला असून जगभरात विरोध प्रदर्शनांना सुरुवात झाली आहे. भारतामध्येही या घटनेचे पडसाद उमटले. जम्मू-काश्मीरमधील Srinagar येथे शिया मुस्लीम समुदायातील लोक मोठ्या संख्येने रस्त्यावर उतरले. लाल चौक परिसरात निषेध व्यक्त करण्यात आला. प्रशासनाने परिस्थिती नियंत्रणात ठेवण्यासाठी लाल चौक आणि क्लॉक टॉवर परिसर सील केला असून सुरक्षा व्यवस्था कडक करण्यात आली आहे. पुढील दोन दिवस शाळा आणि महाविद्यालये बंद ठेवण्याचे आदेश देण्यात आले आहेत. काश्मीरमधील काही विद्यापीठांच्या परीक्षाही स्थगित करण्यात आल्या आहेत. उत्तर प्रदेशची राजधानी Lucknow येथेही शिया समुदायाने मोठ्या प्रमाणावर आंदोलन केले. मौलाना कल्बे जवाब साहेब यांनी लोकांना तीन दिवस शोक पाळण्याचे आणि दुकाने बंद ठेवण्याचे आवाहन केले. दक्षिण काश्मीरमधील पुलवामा, कुलगाम तसेच बांदीपोरा, अनंतनाग, गांदरबल आदी भागांतही लोकांनी एकत्र येत निषेध नोंदवला. दरम्यान, इराणमध्ये संतापाची लाट उसळली आहे. अमेरिका आणि इस्रायलने केलेल्या कारवाईचा बदला घेण्याची शपथ इराणने घेतली आहे. आखाती देशांतील आणि इस्रायलमधील अमेरिकन तळांवर इराणकडून लक्ष्यित हल्ले करण्यात आल्याची माहिती समोर येत आहे. त्याला प्रत्युत्तर म्हणून अमेरिकेकडूनही कारवाई सुरू असल्याचे वृत्त आहे. या घडामोडींमुळे आंतरराष्ट्रीय पातळीवर तणावपूर्ण वातावरण निर्माण झाले असून पुढील काही दिवस परिस्थिती आणखी चिघळण्याची शक्यता वर्तवली जात आहे.
Warning: Undefined variable $URLToRedirect in /home/dailysanchar/public_html/NewsDetails.php on line 213
Warning: Undefined variable $AdImage in /home/dailysanchar/public_html/NewsDetails.php on line 214