ऊसाला ५ हजार रुपये दराच्या मागणीसाठी भिमानगर येथे स्वाभिमानी शेतकरी संघटनेचे महामार्ग रोको आंदोलन; वाहनांच्या लांबच लांब रांगा
ऊसदराच्या मागणीसाठी भिमानगर येथे महामार्ग रोको आंदोलन
सोलापूर : ऊसाला योग्य दर मिळावा आणि शेतकऱ्यांच्या विविध
मागण्यांकडे सरकारचे लक्ष वेधले जावे, यासाठी सोलापूर-पुणे महामार्गावरील
भिमानगर येथे स्वाभिमानी शेतकरी संघटनेच्या वतीने महामार्ग रोको आंदोलन करण्यात
आले. संघटनेचे नेते राजू शेट्टी यांच्या मार्गदर्शनाखाली महाराष्ट्र आणि कर्नाटक
राज्यांतील राष्ट्रीय महामार्ग बंद आंदोलनाच्या पार्श्वभूमीवर हे आंदोलन करण्यात
आले.
ऊसाला प्रतिटन ५ हजार रुपये दर देण्याची मागणी
या आंदोलनादरम्यान ऊसाला प्रतिटन ५ हजार रुपये दर मिळावा, इथेनॉलला प्रतिलिटर ७० रुपये दर द्यावा, तसेच
एमएसबीसंदर्भातील ५० रुपयांच्या मागणीसह इतर मागण्यांसाठी घोषणाबाजी करण्यात आली.
आंदोलकांच्या घोषणांनी परिसर दणाणून गेला.
चार ते पाच तास महामार्गावरील वाहतूक ठप्प
आंदोलनामुळे सोलापूर-पुणे महामार्गावरील वाहतूक सुमारे
चार ते पाच तास बंद राहिली. परिणामी महामार्गाच्या दोन्ही बाजूंना वाहनांच्या
लांबच लांब रांगा लागल्या. प्रवाशांना आणि वाहनचालकांना वाहतूक कोंडीचा सामना
करावा लागला.
आंदोलक आणि पोलिसांमध्ये झटापट
आंदोलनादरम्यान आंदोलक आणि पोलिसांमध्ये झटापट झाल्याची
माहिती समोर आली आहे. शेतकऱ्यांच्या मागण्यांसाठी करण्यात आलेल्या या महामार्ग
रोको आंदोलनामुळे परिसरात तणावाचे वातावरण निर्माण झाले.
