नवरात्रीनिमित्त सोलापुरात ५० गरजू महिलांना साडीवाटप; अभिनव सामाजिक संस्थेकडून ‘गृहलक्ष्मी सन्मान’
नवरात्रीनिमित्त गरजू महिलांचा ‘गृहलक्ष्मी सन्मान’
सोलापूर : नवरात्रीच्या पावन पर्वाचे औचित्य साधून अभिनव
सामाजिक संस्था, महाराष्ट्र राज्य यांच्या वतीने सोलापूर
शहरात सामाजिक उपक्रम राबविण्यात आला. या उपक्रमांतर्गत बेघर आणि वंचित महिलांचा
‘गृहलक्ष्मी सन्मान’ करून त्यांना साड्यांचे वाटप करण्यात आले. एकूण ५० साड्या
वितरित करून महिलांचा गौरव करण्यात आला. सोलापूर महानगरपालिकेच्या अंतर्गत सुरू
असलेल्या बेघर निवारा केंद्रातील महिलांसह सिद्धेश्वर मंदिर परिसरातील फूटपाथवर
राहणाऱ्या आणि जिल्हा परिषद परिसरातील दर्ग्याबाहेर बसणाऱ्या गरजू महिलांना या
उपक्रमाचा लाभ मिळाला.
आदिशक्तीच्या पूजेतून वंचित महिलांना सन्मान
संस्थेच्या अध्यक्ष मीनलताई दास यांनी सांगितले की, नवरात्रीत आदिशक्तीची पूजा केली जाते. याच भावनेतून समाजातील दुर्लक्षित,
निराधार आणि वंचित महिलांना सन्मान मिळावा, या
उद्देशाने संस्थेने या कार्यक्रमाचे आयोजन केले. साडीच्या रूपाने मिळालेला सन्मान
स्वीकारताना अनेक महिलांच्या चेहऱ्यावर आनंदाश्रू दिसून आले. या उपक्रमातून
महिलांप्रती आदर आणि सामाजिक बांधिलकीचा संदेश देण्यात आला.
बेघर निवारा केंद्राकडून पदाधिकाऱ्यांचा सत्कार
या कार्यक्रमाच्या वेळी बेघर निवारा केंद्राच्या वतीने
अभिनव सामाजिक संस्थेच्या उपस्थित पदाधिकाऱ्यांचा सत्कार करण्यात आला. त्यांच्या
सामाजिक कार्याचे कौतुक करून या उपक्रमाबद्दल आभार व्यक्त करण्यात आले.
संस्थेचे पदाधिकारी आणि कार्यकर्ते उपस्थित
या सामाजिक उपक्रमावेळी अभिनव सामाजिक संस्थेच्या अध्यक्ष मीनलताई दास, संपर्क प्रमुख सरोजिनी मकाई, जिल्हाध्यक्ष अरुणा जाधव, जिल्हा उपाध्यक्ष स्वाती घंटे, जिल्हा संघटक अनिता वाघमारे, जिल्हा कार्याध्यक्ष जयश्री हिरेमठ, शहर कार्याध्यक्ष सुनिता घंटे आणि शहर दक्षिण उपाध्यक्ष योगेश्री निंबाळे उपस्थित होत्या. याशिवाय बेघर निवारा केंद्राचे व्यवस्थापक अशोक वाघमारे, आस्था रोटी बँकेचे अध्यक्ष तसेच संस्थेच्या इतर महिला पदाधिकारी आणि कार्यकर्त्यांनी उपस्थित राहून कार्यक्रम यशस्वी करण्यासाठी विशेष परिश्रम घेतले. अभिनव सामाजिक संस्थेच्या या उपक्रमाचे सोलापूर शहरातील विविध स्तरांतून कौतुक होत आहे.
