भारताच्या नावावर ३२ वे पदक; अनाहत सिंगलाही रौप्य, अभय सिंगनेही पटकावले सिल्व्हर
पुणे : आशियाई क्रीडा स्पर्धेत स्क्वॅशमध्ये भारताला दोन
रौप्यपदके मिळाली. महिला एकेरीत अनाहत सिंग, तर पुरुष एकेरीत अभय सिंग यांनी
अंतिम फेरी गाठत रौप्यपदक पटकावले. यामुळे स्पर्धेत भारताच्या पदकांची संख्या ३२
वर पोहोचली.
अनाहत सिंगला शिवसंगरीकडून ३-० ने पराभव
महिला एकेरीच्या अंतिम सामन्यात भारताच्या अनाहत सिंगचा
मलेशियाच्या शिवसंगरी सुब्रमण्यम हिने ३-० असा पराभव केला. शिवसंगरीने ११-४, ११-४ आणि ११-७ अशा गुणांनी तीनही गेम जिंकत सुवर्णपदकावर नाव कोरले. अनाहतला
रौप्यपदकावर समाधान मानावे लागले. शिवसंगरी जागतिक क्रमवारीत पाचव्या स्थानावर
असून, मागील आशियाई क्रीडा स्पर्धेतील सुवर्णपदक विजेती आहे.
शिवसंगरीचा अनाहतविरुद्ध सलग तिसरा विजय
अनाहतविरुद्ध शिवसंगरीचा हा सलग तिसरा विजय ठरला. या
स्पर्धेत मलेशियाने पुरुष आणि महिला स्क्वॅश एकेरीत सुवर्णपदके जिंकली, तर भारताला दोन्ही प्रकारांत रौप्यपदक मिळाले.
अभय सिंगलाही रौप्यपदक
पुरुष एकेरीच्या अंतिम सामन्यात भारताच्या अभय सिंगला
मलेशियाच्या एनजी ईन यो याच्याकडून ३-० असा पराभव स्वीकारावा लागला. एनजीने
११-९, ११-५ आणि ११-५ अशा गुणांनी विजय मिळवत सुवर्णपदक पटकावले. अभयच्या
रौप्यपदकामुळे स्क्वॅशमध्ये भारताच्या पदकांची संख्या दोन झाली. यापूर्वी मिश्र
दुहेरीत जोशना चिनप्पा आणि सेंथिलकुमार यांनी कांस्यपदक जिंकले होते.
ट्रॅप शूटिंगमध्ये भारतीय संघ सातव्या स्थानावर
पुरुष ट्रॅप शूटिंगमध्ये भारतीय नेमबाजांची कामगिरी सध्या
समाधानकारक राहिली आहे. कायनान चेनाई ४७ गुणांसह ११व्या, शपथ भारद्वाज ४५ गुणांसह २२व्या, तर अहवर रिझवी ४१
गुणांसह ३५व्या स्थानावर आहे.
सांघिक क्रमवारीत भारतीय पुरुष संघ सध्या सातव्या
स्थानावर आहे. स्पर्धेचे आणखी दोन दिवस बाकी असल्याने भारतीय नेमबाजांना कामगिरी
सुधारण्याची संधी आहे.
रिकर्व्ह तिरंदाजीत पुरुष आणि महिला संघ उपांत्य फेरीत
रिकर्व्ह तिरंदाजीमध्ये भारताच्या पुरुष आणि महिला
संघांनी उपांत्य फेरीत प्रवेश केला आहे.
- पुरुष संघ: चीनचा ५-१ असा पराभव
- महिला संघ: चायनीज तैपेईचा ६-० असा पराभव
या विजयांसह भारताचे पुरुष, महिला आणि मिश्र रिकर्व्ह संघ उपांत्य
फेरीत पोहोचले आहेत. आगामी सामन्यांत भारताच्या पदकांच्या संख्येत आणखी भर
पडण्याची शक्यता आहे.
