अपघाताचा बनाव करून पतीची हत्या केल्याचा आरोप; पत्नी, प्रियकरासह तिघांविरुद्ध गुन्हा
जालना : भोकरदन तालुक्यातील वाकडी शिवारात २६ वर्षीय तरुणाचा
अपघातात मृत्यू झाल्याचे सुरुवातीला समोर आले होते. मात्र, मृताच्या वडिलांनी मुलाचा मृत्यू अपघात नसून हत्या असल्याचा संशय व्यक्त
करत केलेल्या पाठपुराव्यानंतर या प्रकरणाला वेगळे वळण मिळाले आहे. शुभम येडूबा
वाघ (वय २६, रा. वाकडी) असे
मृत तरुणाचे नाव आहे. या प्रकरणी त्याचे वडील येडूबा राजाराम वाघ यांच्या
तक्रारीवरून भोकरदन पोलीस ठाण्यात पत्नी पूनम उर्फ छकुली शुभम वाघ, रवी महादू चिंचपुरे आणि सोपान संजय जाधव यांच्याविरुद्ध हत्येचा गुन्हा
दाखल करण्यात आला आहे.
पत्नीच्या कथित प्रेमसंबंधात अडथळा ठरत असल्याचा आरोप
पोलिसांकडे दाखल तक्रारीनुसार, शुभमचा विवाह नोव्हेंबर २०२४ मध्ये पूनम उर्फ छकुली हिच्यासोबत झाला होता.
विवाहानंतर काही महिन्यांनी दोघांमध्ये कौटुंबिक वाद सुरू झाले. दरम्यान, पूनम हिचे रवी चिंचपुरे याच्यासोबत कथित प्रेमसंबंध असल्याची माहिती
शुभमच्या कुटुंबीयांना मिळाली होती. पत्नीने पुन्हा नांदावे यासाठी शुभमने
कौटुंबिक न्यायालयात दावा दाखल केला होता.
तक्रारीनुसार, ४ जुलै २०२६ रोजी रवी चिंचपुरे याने
शुभमला फोन करून दावा मागे घेण्याची धमकी दिल्याचा आरोप करण्यात
आला आहे.
दुचाकीने धडक दिल्याचा आरोप
७ जुलै २०२६ रोजी सायंकाळी सुमारे ८ वाजता शुभम
भोकरदन रस्त्यावरील आपल्या शेताकडे पायी जात होता. त्यावेळी वाकडी-भोकरदन
रस्त्यावर कैलास चिंचपुरे यांच्या शेताजवळ सोपान जाधव याने दुचाकीने शुभमला धडक
दिल्याचा आरोप तक्रारीत करण्यात आला आहे. घटनेनंतर कुटुंबीय आणि ग्रामस्थांनी
घटनास्थळी धाव घेतली. गंभीर जखमी अवस्थेतील शुभमला भोकरदन येथील शासकीय रुग्णालयात
दाखल करण्यात आले. मात्र, डॉक्टरांनी त्याला मृत घोषित केले.
वडिलांच्या पाठपुराव्यानंतर प्रकरणाला वेगळे वळण
सुरुवातीला ही घटना अपघात असल्याचे दिसून आले होते. मात्र, शुभमचे वडील येडूबा वाघ यांनी मुलाचा मृत्यू अपघातात झाला नसून त्याची
हत्या करण्यात आल्याचा संशय व्यक्त केला. मुलाला न्याय मिळावा यासाठी त्यांनी
विविध स्तरांवर पाठपुरावा केला. त्यांच्या तक्रारीनंतर पोलिसांनी प्रकरणाची चौकशी
केली आणि अखेर पत्नी, तिचा कथित प्रियकर आणि अन्य एका
व्यक्तीविरुद्ध हत्येचा गुन्हा दाखल करण्यात आला.
पोलिसांकडून पुढील तपास सुरू
या प्रकरणात पूनम उर्फ छकुली शुभम वाघ, रवी महादू चिंचपुरे आणि सोपान संजय जाधव यांच्याविरुद्ध
गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक प्रवीण
सोनावणे करीत आहेत.
