मुकेश अंबानींच्या रिलायन्स शेअर्समध्ये आपटी

मुंबई : भारतातील सगळ्यात मौल्यवान कंपनी म्हणून मिरवणाऱ्या मुकेश अंबानी यांच्या मालकीच्या रिलायन्स इंडस्ट्रीज लिमिटेडच्या शेअर्सनी तळ गाठला आहे. देशांतर्गत बाजारातील घसरण लवकरच थांबायची चिन्हे दिसत नाही आणि गुंतवणूकदारांची धाकधूक कमी होईना. रिलायन्स इंडस्ट्रीज लिमिटेडचे शेअर्स, सोमवारी, संप्तहारंभी सुरुवातीच्या व्यवहारातच मोठ्या प्रमाणात घसरले आणि ५२ आठवड्यांच्या नीचांकी पातळीवर आपटले.परदेशी गुंतवणूकदारांकडून सतत होणारी विक्री, जागतिक मंदीची भीती आणि कडक आर्थिक धोरणांमुळे आरआयएलवरील दबाव वाढत असून त्याचवेळी, सरकार रिलायन्स न्यू एनर्जी लिमिटेड (RNEL) वर १२५ कोटी रुपयांचा दंड आकारण्याची शक्यता आहे. बीएसईवर रिलायन्सचे शेअर्स सोमवारी ३.६३ टक्क्यांनी घसरून ११५६ वर खाली आले आहेत. यामुळे कंपनीचे मार्केट कॅप सुमारे ५६,००० कोटी रुपयांनी कमी झाले तर, या दरम्यान, ब्लूमबर्गच्या अहवालानुसार बॅटरी सेल प्लांट उभारण्यात अयशस्वी झाल्याबद्दल रिलायन्स न्यू एनर्जी लिमिटेडला (RNEL) $१४ दशलक्ष पेक्षा जास्त दंड भरावा लागू शकतो. पीएलआय कार्यक्रमांतर्गत आयात अवलंबित्व कमी करण्यासाठी पंतप्रधान नरेंद्र मोदींच्या प्रयत्नांचा एक भाग होता. भारतीय शेअर बाजारातील घसरणीने छोट्या-मोठ्या कुणालाच सोडले नाही. देशातील सर्वात मौल्यवान कंपनी रिलायन्स इंडस्ट्रीजच्या शेअर्समध्ये आज मोठी घसरण दिसून येत असून सप्ताहारंभी मुकेश अंबानींच्या मालकीच्या कंपनीचे शेअर्स तीन टक्क्यांहून अधिक घसरले तर गेल्या सहा महिन्यांत RIL चे शेअर्स २३% खाली आले आणि अजूनही उच्चांकापेक्षा ८% खाली आहेत.