पाकिस्तानच्या इतिहासातील सर्वाधिक कर्ज – 76 ट्रिलियन रुपयांचा कर्जभार!

पाकिस्तानच्या अर्थव्यवस्थेवर कर्जाचा भुर्दंड अधिकच वाढला असून, 2025 च्या मार्च अखेरीस देशाचे एकूण सार्वजनिक कर्ज 76,007 अब्ज पाकिस्तानी रुपये (76 ट्रिलियन) इतके पोहोचले आहे. ही आकडेवारी पाकिस्तानच्या आर्थिक इतिहासातील सर्वाधिक कर्जाची नोंद आहे.

दहा वर्षांत कर्जात पाचपट वाढ

• 2015-16: 17,380 अब्ज रु.
• 2020-21: 39,860 अब्ज रु.
• 2025: 76,007 अब्ज रु.

अर्थातच, दहा वर्षांत कर्ज पाचपट आणि फक्त चार वर्षांत दुप्पट झाले आहे. या कर्जवाढीने देशाच्या दीर्घकालीन आर्थिक स्थैर्यावर मोठा प्रश्नचिन्ह निर्माण केला आहे.

कर्जाची रचना:

• स्थानिक कर्ज: 51,518 अब्ज पाकिस्तानी रुपये
• आंतरराष्ट्रीय कर्ज: 24,489 अब्ज पाकिस्तानी रुपये
• 2025 च्या पहिल्या 9 महिन्यांत कर्जात 6.7% वाढ झाली.

गरिबीची भयावह स्थिती

जागतिक बँकेनुसार, पाकिस्तानमध्ये 45% जनता गरीबीरेषेखाली, तर 16.5% अत्यंत गरीब श्रेणीत आहे. 2024-25 मध्ये आणखी 19 लाख लोक गरिबीच्या विळख्यात आले आहेत.

'पाकिस्तान केवळ भिक मागण्यातच व्यस्त' – शरीफ

पंतप्रधान शहबाज शरीफ यांनी सार्वजनिकरित्या कबुली दिली की,

"गेल्या 75 वर्षांत पाकिस्तानने केवळ भिक मागण्यात वेळ घालवला. कोणत्याही मैत्रीपूर्ण देशाला भेटलो, की ते समजतात की आपण पैसे मागायला आलो आहोत."

IMF कडून मदत, भारताने नोंदवला आक्षेप

IMF च्या Extended Fund Facility अंतर्गत पाकिस्तानला 1.03 अब्ज डॉलर्सची मदत मिळाली आहे. मात्र तज्ज्ञांच्या मते, ही मदत तात्पुरती ठरेल.

भारताने यावर आक्षेप घेत, पाकिस्तान जागतिक निधीचा वापर दहशतवादी कारवायांसाठी करत असल्याचा आरोप केला. त्यामुळे IMF आणि जागतिक बँकेकडे मदतीच्या वापराबाबत पारदर्शक चौकशीची मागणी केली आहे.