नांदणीतील लाडकी हत्तीण महादेवीला अश्रूंनी निरोप; सर्वोच्च न्यायालयाच्या आदेशानंतर गुजरातकडे रवाना

जयसिंगपूर (२९ जुलै २०२५) — शिरोळ तालुक्यातील नांदणी गावातील प. पू. स्वस्तिश्री जिनसेन भट्टारक पट्टाचार्य महास्वामी संस्थान मठाशी गेली ३५ वर्षे जोडलेली महादेवी हत्तीण सोमवारी रात्री अखेर गुजरातच्या वनतारा हत्ती केंद्राकडे रवाना झाली. मुंबई उच्च न्यायालयाच्या आदेशावर शिक्कामोर्तब करत सर्वोच्च न्यायालयाने मठ संस्थानची याचिका फेटाळली. महादेवीच्या निरोपासाठी नांदणीसह पंचक्रोशीतील नागरिक भावनाविवश झाले होते. गावातील मुख्य रस्त्याने वाजत-गाजत तिची मिरवणूक काढण्यात आली. हत्तीणीच्या पूजनावेळी महिलांनी धाय मोकलून रडले तर मठाचे प्रमुख स्वस्तिश्री जिनसेन भट्टारक यांच्या डोळ्यांतही अश्रू आले. महादेवीला चार वर्षांची असताना कर्नाटकहून नांदणीला आणले गेले होते. २०२० पासून न्यायालयात मठ व प्राणीहक्क संस्थांमध्ये ताण सुरू होता. मुंबई उच्च न्यायालयाने प्राण्यांच्या कल्याणाला प्राधान्य देत हत्तीणीला हलविण्याचे आदेश दिले होते. सोमवारी सर्वोच्च न्यायालयाच्या निर्णयानंतर संध्याकाळी मठात भाविकांची गर्दी उसळली. प्रशासनाच्या परवानगीने मिरवणूक काढण्यात आली आणि रात्री उशिरा गुजरात वनतारा केंद्रात पाठवण्यासाठी महादेवीला अ‍ॅनिमल अ‍ॅम्ब्युलन्समध्ये हलवण्यात आले. नांदणीकरांचा भावनिक निरोप आणि घोषणांनी परिसर दुमदुमला होता. पोलीस बंदोबस्तात महादेवीचा सुरक्षित पाठवण्यात आला. मठ प्रमुख म्हणाले, “महादेवी आम्हाला कधीच विसरता येणार नाही. तिचे संगोपन चांगले व्हावे हीच इच्छा.”