साताऱ्यातील महिला डॉक्टरची आत्महत्या; हातावर लिहून केली धक्कादायक उघड

सातारा : फलटण उपजिल्हा रुग्णालयात कार्यरत असलेल्या एका वरिष्ठ महिला डॉक्टरने आत्महत्या केल्याची अत्यंत धक्कादायक घटना गुरुवारी रात्री उघडकीस आली आहे. या घटनेमुळे फलटण परिसरासह संपूर्ण वैद्यकीय क्षेत्रात खळबळ उडाली आहे. मिळालेल्या माहितीनुसार, संबंधित महिला डॉक्टर काही महिन्यांपासून पोलिस आणि आरोग्य विभागातील वादात अडकल्या होत्या. तपासणीदरम्यान झालेल्या वादानंतर त्यांच्या विरोधात अंतर्गत चौकशी सुरू करण्यात आली होती. या चौकशीमुळे त्या मोठ्या मानसिक तणावाखाली गेल्या होत्या आणि अखेर त्यांनी टोकाचं पाऊल उचललं. हातावर लिहून ठेवला आत्महत्येचा धक्कादायक खुलासा महिला डॉक्टरने आपल्या मृत्यूपूर्वी हातावरच आत्महत्येचं कारण लिहिल्याचं समोर आलं आहे. त्यात “PSI गणेश यांनी माझा चार वेळा बलात्कार केला आणि प्रशांत बनकर यांनी शारीरिक व मानसिक त्रास दिला”, असा मजकूर लिहिलेला आढळला आहे. याआधी त्यांनी वरिष्ठ अधिकाऱ्यांकडे “माझ्यावर अन्याय होत आहे, मी आत्महत्या करीन” अशी तक्रार लेखी स्वरूपात दिली होती, पण त्यावर काहीही कारवाई न झाल्याने त्यांनी अखेर आत्महत्या केली. महिला डॉक्टर फलटणमधील एका हॉटेलमध्ये मृतावस्थेत सापडल्या. रात्री उशिरा पोलिसांनी घटनास्थळी धाव घेतली आणि तपास सुरू केला. सरकारकडून कठोर कारवाईचे आश्वासन या घटनेवर साताऱ्याचे पालकमंत्री शंभूराज देसाई यांनी प्रतिक्रिया देताना म्हटलं — “घटनेचं कारण अजून स्पष्ट नाही. पोलीस अधीक्षकांना प्रत्यक्ष घटनास्थळी जाण्याचे आदेश दिले आहेत. जर सुसाईड नोट किंवा पुरावे मिळाले असतील तर या प्रकरणात कठोर कारवाई केली जाईल. दोषी कोणताही असला तरी त्याला सोडले जाणार नाही.” दरम्यान, साताऱ्याचे पोलीस अधीक्षक तुषार जोशी यांनी सांगितलं की, या प्रकरणी गुन्हा दाखल करण्यात येत असून तपास पोलिसांच्या पथकाकडून सुरू आहे.