नवी मुंबईतील वाशी आणि कामोठे येथे भीषण आग; ६ वर्षांच्या चिमुकलीसह ६ जणांचा मृत्यू, अनेक जखमी

नवी मुंबई | ऐन दिवाळीच्या काळात वाशी आणि कामोठे परिसरात घडलेल्या दोन भीषण आगीच्या घटनांनी संपूर्ण परिसर हादरून गेला आहे.

🔥 वाशीतील 'रहेजा रेसिडेन्सी'मध्ये भीषण आग

आज पहाटे वाशी सेक्टर १४ मधील ‘रहेजा रेसिडेन्सी’ या निवासी संकुलात अचानक भीषण आग लागली. शॉर्टसर्किटमुळे आग लागल्याची प्राथमिक माहिती समोर आली आहे. इमारतीच्या १०, ११ आणि १२ व्या मजल्यावरून ज्वाळा उठल्या.

आग लागल्याची माहिती मिळताच वाशी, नेरुळ, ऐरोली आणि कोपरखैरणे अग्निशमन दलाच्या गाड्या तात्काळ घटनास्थळी दाखल झाल्या. या दुर्घटनेत ६ वर्षांची वेदिका सुंदर बालकृष्णन, कमला हिरल जैन (८४), सुंदर बालकृष्णन (४४) आणि पुजा राजन (३९) यांचा दुर्दैवी मृत्यू झाला आहे. १० हून अधिक रहिवासी गंभीर जखमी असून, त्यांना हिरानंदानी आणि एमजीएम हॉस्पिटलमध्ये उपचारासाठी दाखल करण्यात आले आहे.

💥 कामोठ्यातील स्फोटानंतर आग

दुसरी घटना नवी मुंबईतील कामोठे सेक्टर ३६ मधील आंबे श्रध्दा सहकारी सोसायटीत घडली. रुम क्रमांक ३०१ मध्ये सिलेंडरचा स्फोट झाल्याने भीषण आग लागली. घरात दोन सिलेंडरचा स्फोट झाल्याने आगीने विक्राळ रूप धारण केले. अग्निशमन दलाच्या पाच गाड्या आग विझवण्यासाठी घटनास्थळी दाखल झाल्या होत्या. घरातील तीन सदस्यांना बाहेर काढण्यात यश आले, मात्र आई आणि मुलगी आत अडकून होरपळून मृत्युमुखी पडल्या. दोन्ही आगीच्या घटनांमुळे दिवाळीच्या सणावर शोककळा पसरली असून, स्थानिक नागरिकांमध्ये मोठी हळहळ व्यक्त केली जात आहे.