शिवसेना शिंदे गटात प्रवेशाचा ओघ वाढला; माजी आमदार शिरीष चौधरी, हरीभाऊ पाटील यांचा भगवा स्विकार

मुंबई : आगामी महापालिका आणि स्थानिक स्वराज्य संस्थांच्या निवडणुकांपूर्वी महाराष्ट्रात राजकीय घडामोडींना वेग आला आहे. मुख्यमंत्री आणि उपमुख्यमंत्री एकनाथ शिंदे यांच्या नेतृत्वाखालील शिवसेना (शिंदे गट) मध्ये प्रवेशाचा ओघ वाढत चालला आहे. शिंदे यांच्या उपस्थितीत जळगाव, अमळनेर, पालघर आणि हिंगोली जिल्ह्यातील अनेक नेते, माजी आमदार आणि कार्यकर्त्यांनी भगवा ध्वज हाती घेतला.

 जळगाव-अमळनेर : माजी आमदार शिरीष चौधरी यांचा प्रवेश

अमळनेर विधानसभा मतदारसंघाचे माजी आमदार शिरीष चौधरी यांनी शिवसेनेत जाहीर प्रवेश केला. त्यांच्यासोबत माजी नगरसेवक गुलाब पाटील, माजी शहरप्रमुख प्रवीण पाठक, माजी प्रभारी नगराध्यक्ष अनिल महाजन, माजी सभापती श्रीराम चौधरी आणि असंख्य पदाधिकारी पक्षात दाखल झाले. शिंदे गटाने हा प्रवेश “स्थानिक स्वराज्य निवडणुकांपूर्वी शिवसेनेला बळकटी देणारा टप्पा” असल्याचे म्हटले आहे.

 हिंगोली : माजी आमदार हरीभाऊ पाटील गोरेगावकर यांचा भगवा स्वीकार

हिंगोली विधानसभा मतदारसंघाचे माजी आमदार हरीभाऊ पाटील गोरेगावकर यांनीही शिंदे यांच्या उपस्थितीत पक्षप्रवेश केला. त्यांच्यासोबत माजी जिल्हा परिषद उपाध्यक्ष सुनील पाटील गोरेगावकर, माजी कृषी उत्पन्न बाजार समिती सभापती कांतराव हराळ, डॉ. आर. जी. कावरजे, भय्या देशमुख, बाजीराव जुमडे यांसारख्या स्थानिक नेत्यांनी प्रवेश घेतला.

पालघर जिल्ह्यात राष्ट्रवादीचा धक्का : राजेंद्र माच्छी यांचा प्रवेश

पालघर जिल्ह्यातील डहाणू नगर परिषदेचे माजी उपनगराध्यक्ष आणि राष्ट्रवादी काँग्रेस (शरद पवार गट) चे नेते राजेंद्र लखू माच्छी यांनी शिवसेनेत प्रवेश केला. त्यांच्यासोबत हसमुख धोडी, मिलिंद मावळे, सईद शेख, अस्मिता धोडी, माधुरी धोडी यांसारखे कार्यकर्ते व महिला पदाधिकारी सहभागी झाले.

 शिंदे यांचा दावा : “राज्यभर भगवा पुन्हा झळकतो आहे”

एकनाथ शिंदे यांनी सोशल मीडिया प्लॅटफॉर्म X (Twitter) वर पोस्ट करत म्हटले की, “राज्यभरातील असंख्य नेते आणि कार्यकर्ते विकासाच्या राजकारणावर विश्वास ठेवून शिवसेनेत दाखल होत आहेत. महाराष्ट्र पुन्हा एकदा भगवामय होईल.”

 राजकीय विश्लेषण:

या मोठ्या प्रवेशांमुळे शिवसेना (शिंदे गट) ने आगामी मुंबई, ठाणे, जळगाव, पालघर आणि हिंगोलीतील महापालिका आणि जिल्हा परिषद निवडणुकांसाठी आपली ताकद वाढवली आहे. या प्रवेशांमुळे महाविकास आघाडीतील राष्ट्रवादी (शरद पवार गट) आणि काँग्रेसला धक्का बसण्याची शक्यता वर्तवली जात आहे.