सोलापुरात पत्नीचा खून करून पती पोलीस ठाण्यात हजर; पती वकील असल्याची माहिती

सोलापूर –
सोलापुरातील वसंत विहार, स्वराज्य विहार ब्रिजजवळ राहणाऱ्या प्रशांत रवींद्र राजहंस (वय ४४) यांनी आपल्या पत्नी भाग्यश्री प्रशांत राजहंस (वय ३४) यांचा चाकूने गळ्यावर वार करून खून केला. त्यांनी स्वतः फौजदार चावडी पोलीस ठाण्यात हजर होऊन गुन्ह्याची कबुली दिली.

ही घटना आज (बुधवार) सकाळी ११:१५ वाजण्याच्या सुमारास घडली. पोलिस निरीक्षक राऊत यांच्याकडे राजहंस यांनी उपस्थित होऊन सांगितले की, घरगुती वादातून झालेल्या भांडणानंतर त्यांनी पत्नीच्या गळ्यावर चाकूने वार केला.

पोलिसांनी तातडीने घटनास्थळी धाव घेतली असता, भाग्यश्री राजहंस जखमी व बेशुद्ध अवस्थेत आढळल्या. त्यांना तत्काळ सिव्हिल हॉस्पिटलमध्ये दाखल करण्यात आले, मात्र उपचारापूर्वीच डॉक्टरांनी मृत घोषित केले.

प्रशांत राजहंस हे व्यवसायाने वकील असून, त्यांनी गुन्हा स्वीकारल्याने शहरात एकच खळबळ उडाली आहे. नातेवाईकांनी शासकीय रुग्णालयात मोठी गर्दी केली होती.

खुनामागील नेमके कारण अद्याप स्पष्ट झालेले नाही. पुढील तपास फौजदार चावडी पोलीस करत आहेत.