वसंतदादा पाटील घराण्यातील जयश्री पाटील यांचा भाजपमध्ये प्रवेश

सांगली : माजी मुख्यमंत्री वसंतदादा पाटील यांची नातसून, तसेच दिवंगत मंत्री मदन पाटील यांच्या पत्नी जयश्री पाटील यांनी आज भाजपमध्ये प्रवेश करण्याचा निर्णय जाहीर केला आहे. येत्या बुधवारी (१२ जून २०२५) मुंबईत मुख्यमंत्री देवेंद्र फडणवीस यांच्या उपस्थितीत त्यांचा अधिकृत पक्षप्रवेश होणार आहे. आज सकाळी पालकमंत्री चंद्रकांत पाटील यांनी जयश्री पाटील यांची ‘विजय’ बंगल्यावर भेट घेऊन त्यांच्याशी चर्चा केली. याआधी रविवारी रात्री उशिरा भाजप नेत्यांनी मदनभाऊ गटाशी बैठक घेतली. त्यानंतर जयश्री पाटील यांची मुख्यमंत्री देवेंद्र फडणवीस यांच्याशी मोबाईलवरून चर्चा झाली आणि या प्रवेशाचा निर्णय घेतला गेला. जयश्री पाटील म्हणाल्या, "काँग्रेसने मला निलंबित केल्यानंतर आम्हाला नवीन पक्ष शोधणे आवश्यक होते. कार्यकर्त्यांच्या भावना विचारात घेऊन भाजपमध्ये जाण्याचा निर्णय घेतला आहे. फडणवीस साहेबांचे नेतृत्व आश्वासक वाटते आणि त्यांनी आमच्या कार्यकर्त्यांना न्याय देण्याचा शब्द दिला आहे." चंद्रकांत पाटील म्हणाले, "वसंतदादा पाटील सामान्य माणसाच्या भल्यासाठी राजकारण करत. त्यांच्या विचारांची सुसंगती भाजपच्या विचारधारेशी आहे. त्यामुळे जयश्री पाटील भाजपमध्ये उत्तम कामगिरी करतील." या प्रवेशामुळे वसंतदादा पाटील यांच्या घराण्यातील भाजपमध्ये जाणाऱ्या जयश्री पाटील या पहिल्या व्यक्ती ठरल्या आहेत. याआधी प्रतीक पाटील यांच्या भाजप प्रवेशाबाबत चर्चांना उधाण आले होते. तसेच खासदार विशाल पाटील यांनाही सतत भाजपमध्ये येण्याची आमंत्रणे दिली जात आहेत. मदन पाटील यांनी २००४ मध्ये बंडखोरी करत अपक्ष निवडणूक जिंकून काँग्रेसला पाठिंबा दिला होता. त्यांच्या निधनानंतर जयश्री पाटील यांनी त्यांच्या गटाचे नेतृत्व स्वीकारले. २०१९ च्या विधानसभा निवडणुकीत त्या अपक्ष लढल्या होत्या. त्यामुळे काँग्रेसने त्यांच्यावर निलंबनाची कारवाई केली होती. आगामी महापालिका, जिल्हा परिषद आणि विधानसभा निवडणुकांच्या पार्श्वभूमीवर, जयश्री पाटील यांचा भाजप प्रवेश महत्त्वाचा मानला जात आहे. कार्यकर्त्यांमध्ये नवचैतन्य निर्माण करण्याचा त्यांचा प्रयत्न असल्याचे चित्र आहे.