इस्रायल-इराण संघर्ष शिगेला : क्षेपणास्त्रांचा वर्षाव, दोन्ही देशांमध्ये जबरदस्त हवाई हल्ले

जेरुसलेम/तेहरान | इस्रायल आणि इराण यांच्यातील सैन्य संघर्ष अधिक तीव्र झाल्याची चिन्हं आहेत. ‘ऑपरेशन रायझिंग लायन’ अंतर्गत इस्रायलने इराणच्या अणुऊर्जा प्रकल्पावर हल्ला केला. त्यानंतर इराणनेही जोरदार प्रत्युत्तर दिलं. शनिवारी पहाटेपासून दोन्ही देशांमध्ये हवाई हल्ले सुरु झाले. इराणने दावा केला की त्यांनी इस्रायलवर १५० हून अधिक क्षेपणास्त्रे डागली. त्यामध्ये तेल अवीव आणि जेरुसलेमसारख्या शहरांना लक्ष्य करण्यात आलं. इस्रायलमधील घडामोडी: हवाई हल्ल्यांचे सायरन वाजले: पहाटे इस्रायलच्या तेल अवीव आणि जेरुसलेम शहरांमध्ये सायरनचा आवाज घुमल्यामुळे नागरिक घाबरले आणि आश्रयस्थानांमध्ये लपले. हवाई संरक्षण यंत्रणा सज्ज: इराणी क्षेपणास्त्रांना रोखण्यासाठी संरक्षण प्रणाली पूर्ण क्षमतेने कार्यरत असल्याची माहिती इस्रायली लष्कराने दिली. हल्ल्यांमध्ये हानी: तेल अवीवमधील एका उंच इमारतीला आणि रमात गानमधील अपार्टमेंट इमारतीला क्षेपणास्त्र लागल्याने ३४ जण जखमी आणि १ मृत्यू झाल्याचे पोलिसांनी सांगितले. बचावकार्य सुरु: हल्ल्यांनंतर बचाव पथके तातडीने घटनास्थळी दाखल झाली आहेत. इराणमधील परिस्थिती: तेहरानमध्ये स्फोटांचे आवाज: राजधानी तेहरानमध्ये अनेक ठिकाणी स्फोटांचे आवाज ऐकू आल्याचे स्थानिक वृत्तांत. विमानतळावर हल्ला: मेहराबाद आंतरराष्ट्रीय विमानतळावर दोन क्षेपणास्त्रे आदळली, ज्यामुळे मोठा स्फोट आणि आगीचा भडका उडाल्याचं समोर आलं आहे. अणुशास्त्रज्ञांवर हल्ला: इस्रायलने शुक्रवारी इराणच्या अणुशास्त्रज्ञांवर आणि लष्करी ठिकाणांवर हल्ले केले, त्याचं प्रत्युत्तर म्हणून इराणकडून ही कारवाई झाली. आंतरराष्ट्रीय प्रतिक्रिया: मोदी-नेतान्याहू संवाद: इस्रायलचे पंतप्रधान नेतान्याहू यांनी पंतप्रधान नरेंद्र मोदी यांच्याशी संवाद साधून परिस्थितीची माहिती दिली. ट्रम्प यांची धमकी: अमेरिकेचे माजी अध्यक्ष डोनाल्ड ट्रम्प यांनी इराणला अणुकरारावर सहमती न दर्शवल्यास मोठा हल्ला करण्याची धमकी दिली आहे.