श्री वटवृक्ष स्वामी मंदिरात गुरुप्रतिपदा उत्सव साजरा; समर्थांच्या पारंपारिक पालखी मिरवणुकीने वेधले लक्ष

अक्कलकोट: अवधूतचिंतन श्री  गुरुदेव दत्त, स्वामी समर्थ महाराज की जयच्या जयघोषात श्री वटवृक्ष स्वामी महाराज मंदिरात प्रतिवर्षाप्रमाणे गुरुप्रतिपदा उत्सव मोठ्या भक्तिभावात साजरा करण्यात आला.  यानिमित्ताने पहाटे ५ वाजता श्रींची काकड आरती संपन्न झाली. यानंतर स्वामी भक्तांच्यावतीने नित्यनियमाने होणारे समितीचे अध्यक्ष महेश इंगळे यांच्या उपस्थितीत पुरोहित मंदार महाराज व ब्रम्हवृंदांच्या वैदिक मंत्रोच्चारात देवस्थानचे विश्वस्त महेश गोगी यांच्या हस्ते पारंपरिक देवस्थानचे लघुरुद्र करण्यात आले. सकाळी  ११.३० वाजता श्रींना नैवेद्य आरतीद्वारे महानैवेद्य अर्पण करून भक्त निवास येथे स्वामी भक्तांना भोजन महाप्रसाद देण्यात आला. याचा  हजारो स्वामी भक्तांनी लाभ घेतला.  दिवसभर हजारो  भाविकांनी श्रींचे दर्शन घेतले. सर्व स्वामी भक्तांचे दर्शन सुलभतेने होण्यासाठी  मंदिर समितीचे अध्यक्ष  इंगळे यांच्या मार्गदर्शनाखाली कर्मचारी व सेवेकरी प्रयत्नशील होते. सायंकाळी ५ वाजता श्रींच्या सजविलेल्या पालखी सोहळ्याची सुरुवात देवस्थानचे पुजारी मोहन महाराज, मंदार महाराज, व्यंकटेश महाराज, प्रथमेश इंगळे यांच्या हस्ते पालखी पूजन करून झाली.यावेळी मंदिर समितीचे सचिव आत्माराम घाटगे, विश्वस्त महेश गोगी,उज्ज्वला सरदेशमुख, संपतराव शिंदे, प्रदीप हिंडोळे, महादेव तेली,अमर पाटील, प्रसन्न हत्ते, रामचंद्र समाणे, संतोष पराणे, श्रीकांत झिपरे, सागर गोंडाळ, महेश काटकर, संजय पवार, स्वामीनाथ लोणारी, श्रीशैल गवंडी, ऋषिकेश लोणारी, अविनाश क्षीरसागर आदींची प्रमुख उपस्थिती  होती. वारकरी दिंडया, बँड पथक व स्वामीनामाच्या जयघोषात निघालेली ही पालखी मिरवणूक पुढे   फत्तेसिंह चौक, मेन रोड, कारंजा चौक, समाधी मठ, परतीचा मार्ग कारंजा चौक, मौलाली गल्ली, सुभाष गल्ली, मधला मारुती, भारत गल्ली, देशमुख गल्ली, मार्गे वटवृक्ष मंदिरात रात्री साडेनऊ वाजता पालखी मंदिरात आल्यानंतर गुरु भजन व आरती होवून उपस्थित सर्व भाविकांना मंदिर समितीच्यावतीने प्रसाद वाटप करण्यात आला. यानंतर गुरूप्रतिपदा उत्सव कार्यक्रमाची सांगता झाली. यावेळी  संतोष जमगे, लखन सुरवसे, संजय बडवे, मोहन शिंदे, वैभव जाधव,दीपक जरिपटके, ज्योती जरिपटके, प्रसाद पाटील , विपुल जाधव, नागनाथ जेऊरे, राजेश निलवाणी,अक्षय पांचाळ, नागनाथ गोमदे यांच्यासह  देवस्थानचे सेवेकरी व स्वामीभक्त मोठ्या संख्येने उपस्थित होते.