सेवासदनमध्ये चिमणी दिनानिमित्त घरट्यांचे प्रदर्शन

सोलापूर :-  येथील सेवासदन कनिष्ठ महाविद्यालयाच्या पर्यावरण विभागातर्फे जागतिक चिमणी दिनाचे औचित्य साधून पर्यावरणपूरक घरट्यांचे प्रदर्शन आयोजित करण्यात आले. विद्यार्थिनींना पर्यावरण संवर्धनाची जाणीव व्हावी आणि त्यांचा सक्रिय सहभाग वाढावा, यासाठी या उपक्रमाचे आयोजन करण्यात आले. प्रदर्शनाचे उद्घाटन पर्यावरणदूत डॉ. मनोज देवकर आणि महाविद्यालयाचे प्राचार्य डॉ. सतीश कुलकर्णी यांच्या हस्ते करण्यात आले.

पक्ष्यांचे संरक्षण आणि पर्यावरण संवर्धन:
प्रदूषण, वाढती लोकसंख्या आणि बदललेली जीवनशैली यामुळे चिमण्यांची संख्या घटत चालली आहे. अन्नसाखळीतील महत्त्वपूर्ण घटक असलेल्या चिमण्यांचे संरक्षण अत्यावश्यक असल्याचे डॉ. मनोज देवकर यांनी आपल्या मार्गदर्शनपर भाषणात सांगितले. पर्यावरण संवर्धन ही प्रत्येकाची जबाबदारी असल्याचे त्यांनी नमूद केले.

विद्यार्थिनींचा सहभाग:
विद्यार्थिनींनी वापरलेल्या प्लास्टिक, कागद, लाकूड आणि इतर पर्यावरणपूरक साहित्याने तयार केलेली घरटी या प्रदर्शनात मांडण्यात आली. या माध्यमातून चिमण्यांसाठी सुरक्षित अधिवास निर्माण करण्याचा संदेश दिला गेला.

मान्यवरांचे मार्गदर्शन:
प्राचार्य डॉ. सतीश कुलकर्णी यांनी जागतिक पर्यावरण दिनाचे महत्त्व स्पष्ट केले. पुणे सेवासदन संस्था सोलापूर शाखेच्या अध्यक्षा शीला मिस्री, उपाध्यक्ष डॉ. राजीव प्रधान, कार्यकारिणी सदस्य डॉ. श्रीकांत येळेगावकर आणि सचिव वीणा पतकी यांनी विद्यार्थिनींच्या उपक्रमाचे कौतुक केले. कार्यक्रमाचे सूत्रसंचालन प्रा. गीता मोहोळकर यांनी केले. विद्यार्थिनींना डॉ. तेजस्विनी मस्के यांचे मार्गदर्शन लाभले.