आंध्र प्रदेशात चार वर्षांच्या मुलाचा निर्घृण खून; शेजाऱ्याने आईवरील रागातून घेतला सूड
अनंतपूर (आंध्र प्रदेश): आंध्र
प्रदेशातील अनंतपूर जिल्ह्यातील अरुणोदय कॉलनीत एक धक्कादायक व माणुसकीला काळिमा
फासणारी घटना उघडकीस आली आहे. येथे एका निष्पाप चार वर्षांच्या मुलाची त्याच्याच
शेजाऱ्याने गळा दाबून निर्घृण हत्या केली. आरोपीने मुलाचा मृतदेह धोबी घाटावर
टाकून पुरावे नष्ट करण्याचा प्रयत्न केला.
आईवरील रागातून निर्दयी सूड —
पोलिसांच्या माहितीनुसार, मृत मुलाचे नाव सुशांक
असून, तो हरी आणि नागवेणी या दांपत्याचा मुलगा होता. शेजारी
राहत असलेल्या पेनय्या आणि सावित्री यांच्या कुटुंबाशी त्यांचे चांगले संबंध होते.
मात्र, काही दिवसांपूर्वी सावित्री आणि नागवेणी यांच्यात
किरकोळ वाद झाला. या वादातून पेनय्या संतापला आणि शेजाऱ्याच्या मुलावर सूड
घेण्याचा निश्चय केला.
२५ ऑक्टोबरला घडली घटना —
२५ ऑक्टोबर रोजी हरी आणि नागवेणी रुग्णालयात गेले असताना पेनय्याने
त्यांच्या चार वर्षांच्या मुलाचे अपहरण केले. रात्री उशिरा घरी परतल्यावर पालकांना
मुलगा घरात दिसला नाही. सुरुवातीला त्यांनी तो आजीबरोबर झोपला असेल असे समजले,
पण दुसऱ्या दिवशीही मुलगा न दिसल्याने त्यांनी ताबडतोब पोलिसांना
कळवले.
पोलिस तपासात उघड झाले धक्कादायक सत्य —
शोधमोहीम सुरू झाल्यानंतर पालकांना शंका आली की त्यांचा शेजारीच या
प्रकरणात गुंतलेला आहे. पोलिसांनी पेनय्याला ताब्यात घेतले असता, त्याने गुन्ह्याची कबुली दिली. चौकशीत त्याने सांगितले की, सुशांकला घरातून ओढून नेऊन त्याचा गळा दाबून ठार केले. त्यानंतर त्याचा
मृतदेह एका पिशवीत भरून धोबी घाटावर फेकून दिला.
आरोपी अटकेत, तपास सुरू —
पोलिसांनी मृतदेह ताब्यात घेऊन शवविच्छेदनासाठी पाठवला असून,
आरोपी पेनय्याविरुद्ध खून आणि अपहरणाचे गुन्हे दाखल करण्यात आले
आहेत. पोलिसांकडून या प्रकरणाचा सखोल तपास सुरू आहे. या घटनेने संपूर्ण परिसरात
संताप आणि हळहळ व्यक्त होत आहे.
