1019 कोटींचा जिल्हा विकास आराखडा नियोजन समितीची मान्यता; 200 कोटी वाढवून मागणार

सोलापूर: 30- 2025-26 अंतर्गत जिल्हा वार्षिक योजना सर्वसाधारण 861.89 कोटी, अनुसूचित जाती उपयोजना 152 कोटी तर आदिवासी क्षेत्राबाहेरील उपयोजना 5.44 कोटी अशा एकूण 1 हजार 19 कोटी 33 लाखांच्या प्रारूप आराखड्यास जिल्हा नियोजन समितीने मान्यता दिली असून यात दोनशे कोटी रुपयांचा वाढीव आराखडा तयार करून तो राज्य नियोजन समितीसमोर सादर करण्यात येणार असल्याचे पालकमंत्री जयकुमार गोरे यांनी सांगितले. गुरुवारी, नियोजन भवन येथील सभागृहात पार पडलेल्या जिल्हा नियोजन समितीच्या बैठकीत पालकमंत्री गोरे बोलत होते. यावेळी खासदार धैर्यशील मोहिते-पाटील (ऑनलाइनद्वारे), खासदार ओमप्रकाश राजेनिंबाळकर, आमदार दिलीप सोपल, सचिन कल्याणशेट्टी, राजू खरे, अभिजित पाटील, उत्तम जानकर, डॉ. बाबासाहेब देशमुख, नारायण पाटील, सुभाष देशमुख, देवेंद्र कोठे, समाधान अवताडे, जिल्हाधिकारी कुमार आशीर्वाद, मनपा आयुक्त शीतल उगले-तेली, पोलीस आयुक्त एम. राज कुमार, जिल्हा परिषदेचे मुख्य कार्यकारी अधिकारी कुलदीप जंगम, पोलीस अधीक्षक अतुल कुलकर्णी उपस्थित होते. यावेळी उपस्थित लोकप्रतिनिधींनी जिल्ह्याच्या सर्वांगीण विकासाच्या दृष्टीने नियोजन समितीतून निधी मिळणे, जुनी कामे वेळेत मार्गी लावणे, शेतकर्‍यांना पीकविमा मिळणे, पीक कर्जाचा पुरवठा बँकांनी करणे, पाणीपुरवठा योजनेच्या बिलापोटी निधी मिळणे, पंधरावा वित्त आयोगाचे निधी वाटप, कृषी यांत्रिकीकरण, ठिबक अनुदान, नियमित कर्ज पुरवठा करणार्‍या शेतकर्‍यांना प्रोत्साहनपर अनुदान मिळणे, रोहित्र दुरुस्तीसाठी निधी मिळणे, तीर्थक्षेत्रांना मान्यता देणे, नवबौध्द घटकांच्या योजनांसाठी निधी उपलब्ध करणे, दुहेरी पाइपलाइनच्या अनुषंगाने त्वरित कारवाई करणे, क्रीडा विभाग व आरोग्य विभागात समितीच्या निधीतून प्रस्तावित केलेल्या कामांची चौकशी करणे आदी मागण्या केल्या. प्रारंभी जिल्हाधिकारी कुमार आशीर्वाद यांनी जिल्हा वार्षिक योजना 2024-25 व 2025-26 बाबत बैठकीत माहिती दिली तर जिल्हा नियोजन अधिकारी दिलीप पवार यांनी समितीसमोरील विषयांचे वाचन केले.

प्रारुप आराखड्याची वैशिष्ट्ये

* कृषी व संलग्न सेवा ः 50.26 कोटी

* ग्रामीण क्षेत्राच्या विकासाच्या योजना ः 60 कोटी

* जलसंधारण विभागाच्या योजना ः 55 कोटी

* ऊर्जा विकास ः 60 कोटी

* शिक्षण विभागाच्या योजना ः 39 कोटी

* महिला ब बाल विकासाच्या योजना ः 19.85 कोटी

* आरोग्य सेवांचे बळकटीकरण ः 63.15 कोटी

* नगर विकासाच्या योजना ः 106 कोटी

* रस्ते व परिवहन ः 68.20 कोटी

* पर्यटन, तीर्थक्षेत्र, संरक्षित स्मारके यांचे संवर्धन ः 46.20 कोटी

* पोलीस व तुरुंग व्यवस्थेचे बळकटीकरण ः 21.85 कोटी

जिल्ह्यातील आठ तीर्थक्षेत्रांना क वर्गाचा दर्जा

* श्री क्षेत्र जकराया देवस्थान, तेलगाव (सीना), ता. उ. सोलापूर

* श्री क्षेत्र कानिफनाथ देवस्थान, गाताची वाडी, ता. बार्शी

* श्री क्षेत्र म्हस्कोबा देवस्थान, लक्ष्मी दहिवडी, ता. मंगळवेढा

* श्री क्षेत्र महालिंगराया देवस्थान, मरवडे, ता. मंगळवेढा

* श्री क्षेत्र गुरुगंगालिंग महाराज मंदिर देवस्थान, हिळ्ळी, ता. अक्कलकोट

* श्री क्षेत्र विठ्ठल रुक्मिणी व मारुती मंदिर देवस्थान, जाधववाडी, ता. पंढरपूर

* श्री क्षेत्र शिव शिवाई देवस्थान, कोरफळे, ता. बार्शी

* श्री क्षेत्र बिरोबा देवस्थान, तपकिरी शेटफळ, ता. पंढरपूर

जिल्हा वार्षिक योजना 2024-25 अंतर्गत 20 जानेवारीपर्यंत एकूण 78 टक्के निधी खर्च झालेला आहे. उर्वरित मंजूर निधी मार्च 2025 अखेर खर्च करण्याची जबाबदारी संबंधित विभागप्रमुखाची असून त्यासाठी काटेकोरपणे नियोजन करावे, असे निर्देश पालकमंत्री जयकुमार गोरे यांनी दिले.