ज्येष्ठ सामाजिक कार्यकर्ते डॉ. सतिश वळसंगकर यांचे निधन; सोलापुरात हळहळ
सोलापूर : राष्ट्रीय स्वयंसेवक संघाचे सक्रिय स्वयंसेवक
तसेच ज्येष्ठ सामाजिक कार्यकर्ते डॉ. सतिश वळसंगकर (वय ७२) यांचे गुरुवारी दुपारी सुमारे
बारा वाजता पुणे येथे अल्पशा आजाराने निधन झाले. त्यांच्या निधनाने सोलापूरच्या
सामाजिक, शैक्षणिक आणि सहकार क्षेत्रात हळहळ व्यक्त होत आहे.
डॉ. वळसंगकर यांनी सोलापूर शहरातील विविध सामाजिक आणि शैक्षणिक संस्थांमध्ये
महत्त्वपूर्ण योगदान दिले. हरिभाई देवकरण प्रशाला आणि सोलापूर जनता सहकारी बँक यांसह
अनेक संस्थांवर त्यांनी संचालक म्हणून जबाबदारी सांभाळली होती. समाजकारणात त्यांचा
सक्रिय सहभाग होता आणि विविध उपक्रमांमधून त्यांनी सामाजिक बांधिलकी जपली. गेल्या
काही दिवसांपासून ते पुणे येथे आपल्या मुलाकडे वास्तव्यास होते. दरम्यान, प्रकृती अस्वस्थ झाल्यानंतर त्यांच्यावर उपचार सुरू होते. मात्र गुरुवारी
दुपारी त्यांची प्राणज्योत मालवली. त्यांच्या पश्चात कुटुंबीय, नातेवाईक आणि मोठा मित्रपरिवार असा परिवार आहे. त्यांच्यावर पुणे येथे
अंत्यसंस्कार करण्यात येणार असल्याची माहिती कुटुंबीयांनी दिली.
डॉ. सतिश वळसंगकर यांच्या निधनामुळे सोलापूरमधील सामाजिक
व शैक्षणिक क्षेत्रात मोठी पोकळी निर्माण झाल्याची भावना अनेकांनी व्यक्त केली
आहे.
