खासदार प्रणिती शिंदे यांचा मंगळवेढा तालुक्यात दौरा; शेतकरी प्रश्नांवर सरकारवर निशाणा
मंगळवेढा तालुक्यातील खूपसंगी, जुनोनी आणि लक्ष्मी दहिवडी या गावांचा
खासदार Praniti Shinde यांनी दौरा करून ग्रामस्थांच्या विविध
समस्या जाणून घेतल्या. या दौऱ्यात ग्रामस्थांनी विकासकामांसाठी अनेक मागण्या
मांडल्या. जुनोनी येथे मंदिरांसाठी सभामंडप, जिल्हा परिषद
मराठी शाळेच्या संरक्षण भिंतीचे बांधकाम, स्मशानभूमी शेड,
पाणीपुरवठ्यासाठी सुविधा तसेच विविध वस्त्यांमध्ये वीज व्यवस्था आणि
रस्त्यांचे डांबरीकरण करण्याच्या मागण्या करण्यात आल्या. खूपसंगी येथे रस्ते
बांधकाम, पाणीटंचाई निवारणासाठी उपाययोजना, पाण्याची टाकी, शुद्धीकरण व्यवस्था, स्मशानभूमी सुविधा, तसेच विविध सामाजिक घटकांसाठी
योजनांची अंमलबजावणी करण्याची मागणी ग्रामस्थांनी केली. लक्ष्मी देवी
यात्रेनिमित्त त्यांनी लक्ष्मी दहिवडी गावालाही भेट देत नागरिकांशी संवाद साधला. यावेळी
बोलताना खासदार प्रणिती शिंदे म्हणाल्या की, आपण सत्तेसाठी
नव्हे तर जनतेच्या सेवेसाठी निवडून आलो असून नागरिकांच्या समस्या सोडवण्यासाठी
सातत्याने प्रयत्न करत आहोत. दुष्काळ किंवा अतिवृष्टीसारख्या संकटांमध्येही
जनतेच्या पाठीशी उभे राहून अन्यायाविरोधात आवाज उठवण्याचे काम सुरू असल्याचे
त्यांनी नमूद केले.
त्यांनी सरकारवर टीका करत सांगितले की, शेतकऱ्यांच्या सहनशीलतेची परीक्षा घेतली जात असून पाणी उपलब्ध नसतानाही
शेतीपंपांची वीज तोडली जाते. घरकुल योजना केवळ कागदावर असल्याचा आरोपही त्यांनी
केला. तसेच प्रशासनावर दबाव असल्याचा उल्लेख करत अधिकाऱ्यांनी जनतेच्या सेवेसाठी
तत्पर राहावे, असे आवाहन त्यांनी केले.
या दौऱ्यात स्थानिक पदाधिकारी, कार्यकर्ते, ग्रामस्थ तसेच विविध संस्थांचे
प्रतिनिधी मोठ्या संख्येने उपस्थित होते.
