एअर इंडियाच्या विमानाला अपहरणाचा सुरक्षा अलर्ट; दिल्लीऐवजी जयपूरमध्ये आपत्कालीन लँडिंग
एअर इंडियाच्या विमानाला अपहरणाचा सुरक्षा अलर्ट
फ्रँकफर्टहून नवी दिल्लीला येणाऱ्या एअर इंडियाच्या AI-2030 विमानाबाबत अपहरणासंदर्भातील सुरक्षा अलर्ट मिळाल्याची माहिती समोर आली
आहे. या घटनेनंतर सुरक्षा यंत्रणा सतर्क झाल्या असून, खबरदारीचा
उपाय म्हणून विमानाचे दिल्लीऐवजी जयपूर विमानतळावर आपत्कालीन लँडिंग करण्यात
आल्याचे वृत्त आहे.
नेमकी घटना काय?
मिळालेल्या माहितीनुसार, एअर इंडियाच्या AI-2030 विमानाने मंगळवारी संध्याकाळी सुमारे ७.३० वाजता फ्रँकफर्टहून दिल्लीच्या
दिशेने उड्डाण केले होते. हे विमान बुधवारी पहाटे सव्वाचारच्या सुमारास दिल्लीतील
इंदिरा गांधी आंतरराष्ट्रीय विमानतळावर उतरणे अपेक्षित होते. मात्र, प्रवासादरम्यान अपहरणासंदर्भातील सुरक्षा अलर्ट मिळाल्याने विमानाचा मार्ग
बदलण्यात आला. खबरदारीचा उपाय म्हणून विमान जयपूर विमानतळावर उतरवण्यात आल्याची
माहिती आहे.
सुरक्षा यंत्रणांकडून तपासणी
विमान जयपूर विमानतळावर उतरवल्यानंतर सुरक्षा यंत्रणा, पोलीस आणि गुप्तचर विभागाच्या अधिकाऱ्यांकडून तपासणी सुरू करण्यात आल्याचे
सांगितले जात आहे. प्रवाशांच्या सुरक्षेच्या दृष्टीने विमानतळावरील सुरक्षा
व्यवस्था कडक करण्यात आली.
दरम्यान, विमानात कोणतीही संशयास्पद वस्तू
आढळल्याची अधिकृत पुष्टी उपलब्ध नाही. अपहरणाचा अलर्ट नेमका कोणत्या कारणामुळे
मिळाला, याबाबतही स्पष्ट माहिती समोर आलेली नाही. या
प्रकरणातील अधिकृत माहिती आणि तपासाचे निष्कर्ष समोर आल्यानंतरच घटनेचे नेमके कारण
स्पष्ट होऊ शकेल.
