पश्चिम बंगालमध्ये भाजप कार्यकर्त्यांवर बॉम्ब हल्ला; पाच जण जखमी
पश्चिम बंगालमध्ये निवडणुकीनंतर सुरू असलेला हिंसाचार
थांबण्याची चिन्हे दिसत नसताना उत्तर २४ परगणा जिल्ह्यात भाजप कार्यकर्त्यांवर
बॉम्ब हल्ला झाल्याची धक्कादायक घटना समोर आली आहे. या हल्ल्यात भाजपचे पाच
कार्यकर्ते जखमी झाले असून परिसरात तणावाचे वातावरण निर्माण झाले आहे. ही घटना
पानीहाटी परिसरातील दत्ता रोड भागात बुधवारी मध्यरात्री घडली. पोलिसांच्या
माहितीनुसार, काही भाजप कार्यकर्ते स्थानिक नागरिकांशी
संवाद साधत असताना दुचाकीवरून आलेल्या चार अज्ञात हल्लेखोरांनी त्यांच्यावर देशी
बॉम्ब फेकले. हल्लेखोरांनी सलग तीन बॉम्ब फेकल्यानंतर घटनास्थळावरून पळ काढला.
या हल्ल्यात जखमी झालेल्या पाच कार्यकर्त्यांना तातडीने
आरजी कर वैद्यकीय महाविद्यालय आणि रुग्णालयात दाखल करण्यात आले असून त्यांच्यावर
उपचार सुरू आहेत. घटनेनंतर पोलिसांनी परिसरात बंदोबस्त वाढवला असून केंद्रीय
सुरक्षा दलाचे जवानही तैनात करण्यात आले आहेत. दरम्यान, भाजप नेते Suvendu Adhikari यांचे खासगी स्वीय
सहाय्यक चंद्रनाथ रथ यांच्या हत्येनंतर काही तासांतच ही घटना घडल्याने राजकीय
वातावरण आणखी तापले आहे. सुवेंदू अधिकारी यांनी या प्रकरणावर प्रतिक्रिया देताना
राज्यात गेल्या अनेक वर्षांपासून सूडाचे राजकारण सुरू असल्याचा आरोप केला.
“राज्यात महाजंगलराज निर्माण झाले असून हिंसाचारासाठी जबाबदार असणाऱ्यांना सोडले
जाणार नाही,” असे त्यांनी म्हटले आहे.
भाजपने या हल्ल्यामागे तृणमूल काँग्रेसचा हात असल्याचा
आरोप केला आहे. मात्र याबाबत अधिकृतरीत्या कोणतीही पुष्टी झालेली नाही.
पोलिसांकडून परिसरातील सीसीटीव्ही फुटेज तपासले जात असून आरोपींचा शोध सुरू आहे.
