सोलापुरात नागरिक पाण्यासाठी त्रस्त, महापालिकेचे दोन टँकर ५ ते ६ महिन्यांपासून बंद; ठाकरे गटाचा प्रशासनाला सवाल
सोलापुरात पाणीटंचाई, महापालिकेचे दोन टँकर अनेक महिन्यांपासून बंद
सोलापूर : शहरात सध्या चार ते पाच दिवसांआड पाणीपुरवठा
होत असून, जिल्ह्यातही दुष्काळजन्य परिस्थिती निर्माण झाली आहे. नागरिकांना
पाण्यासाठी धावपळ करावी लागत असताना सोलापूर महानगरपालिकेचे स्वतःचे दोन पाण्याचे
टँकर गेल्या पाच ते सहा महिन्यांपासून बंद अवस्थेत असल्याचा प्रकार समोर आला आहे. शिवसेना
उद्धव बाळासाहेब ठाकरे पक्षाचे प्रताप चव्हाण आणि महेश धाराशिवकर यांनी हा मुद्दा
उपस्थित करत महापालिका प्रशासनाच्या कारभारावर प्रश्नचिन्ह उपस्थित केले आहे.
डफरीन हॉस्पिटलच्या आवारात टँकर नादुरुस्त अवस्थेत
महापालिकेच्या डफरीन हॉस्पिटल अर्थात पुण्यश्लोक
अहिल्यादेवी होळकर हॉस्पिटलच्या आवारात महापालिकेचे दोन पाण्याचे टँकर अनेक
महिन्यांपासून नादुरुस्त अवस्थेत उभे असल्याचे संबंधितांनी निदर्शनास आणून दिले
आहे. शहरातील अनेक भागांमध्ये पाण्याची गरज भागवण्यासाठी टँकरद्वारे पाणीपुरवठा
करावा लागत आहे. अशा परिस्थितीत महापालिकेचे स्वतःचे टँकर बंद असताना खासगी टँकरचा
वापर का केला जात आहे, असा सवाल प्रताप चव्हाण आणि महेश
धाराशिवकर यांनी उपस्थित केला आहे.
खासगी टँकरवर खर्च, मग महापालिकेचे टँकर बंद का?
पाणीटंचाईच्या काळात महापालिका खासगी टँकरना हजारो रुपये
भाडे देऊन पाणीपुरवठा करत असल्याचा दावा करण्यात आला आहे. एकीकडे नागरिकांना
पाण्यासाठी संघर्ष करावा लागत असताना दुसरीकडे उपलब्ध असलेली महापालिकेची वाहने
वापरात नसणे, ही गंभीर बाब असल्याची टीका ठाकरे गटाने
केली आहे. दुष्काळजन्य परिस्थितीत पाण्याचा प्रत्येक थेंब महत्त्वाचा असताना
उपलब्ध साधनसामग्रीचा पुरेपूर वापर न होणे हे प्रशासनाचे अपयश असल्याचेही त्यांनी
म्हटले आहे.
टँकर तातडीने दुरुस्त करून सेवेत आणण्याची मागणी
महापालिकेचे दोन्ही टँकर बंद अवस्थेत ठेवण्यास जबाबदार
असलेल्या संबंधित अधिकाऱ्यांवर कडक कारवाई करावी आणि दोन्ही टँकर तातडीने दुरुस्त
करून पाणीपुरवठ्याच्या सेवेत दाखल करावेत, अशी मागणी शिवसेना उद्धव बाळासाहेब ठाकरे
पक्षाच्या वतीने करण्यात आली आहे. पाणीटंचाईच्या पार्श्वभूमीवर महापालिका प्रशासन
या मागणीची दखल घेऊन काय कार्यवाही करते, याकडे नागरिकांचे
लक्ष लागले आहे.
