सात रस्ता परिसरात महापालिकेची अतिक्रमणावर धडक कारवाई; हातगाड्यांसह साहित्य जप्त
सोलापूर : शहरातील अतिक्रमणाच्या समस्येला आळा घालण्यासाठी सोलापूर
महानगरपालिकेच्या अतिक्रमण विभागाने सात रस्ता परिसरात धडक कारवाई केली. गुरुवार, २९ ऑक्टोबर रोजी राबविण्यात आलेल्या या मोहिमेत रस्त्यावर अनधिकृतपणे
ठेवण्यात आलेल्या हातगाड्या आणि इतर साहित्य जप्त करण्यात आले.
अतिक्रमण विभागाचे नियंत्रण अधिकारी श्री. वाघमारे
यांच्या मार्गदर्शनाखाली आणि अतिक्रमण विभागप्रमुख सोपान कांबळे यांच्या उपस्थितीत
ही कारवाई करण्यात आली. यावेळी ज्युनिअर इंजिनिअर गणेश काकडे आणि राजकुमार कावळे
उपस्थित होते.
हातगाड्या आणि गॅस टाक्या जप्त
महापालिकेच्या पथकाने या कारवाईदरम्यान तीन चारचाकी लाकडी
हातगाड्या, तीन लोखंडी हातगाड्या, दोन गॅस टाक्या आणि प्लास्टिक खुर्च्या जप्त केल्या. रस्त्यावर अनधिकृतपणे
ठेवलेल्या साहित्यामुळे सार्वजनिक जागेचा वापर आणि वाहतुकीत अडथळे निर्माण होऊ
नयेत, हा या मोहिमेमागील उद्देश असल्याचे सांगण्यात आले.
अतिक्रमणमुक्त रस्त्यांसाठी कारवाईची अपेक्षा
सात रस्ता हा सोलापूर शहरातील महत्त्वाचा आणि वर्दळीचा
परिसर आहे. या भागात अतिक्रमणामुळे वाहतुकीला अडथळा निर्माण होऊ नये, यासाठी महापालिकेने ही मोहीम राबवली. शहरातील रस्ते आणि सार्वजनिक जागा
अतिक्रमणमुक्त ठेवण्यासाठी अशा कारवाया नियमितपणे सुरू ठेवाव्यात, अशी अपेक्षा नागरिकांकडून व्यक्त होत आहे.
