पुणे पदवीधर निवडणुकीत हर्षदा देशमुख-जाधव यांची ८,८५२ मतांची आघाडी; सोलापुरात राष्ट्रवादीच्या कार्यकर्त्यांचा जल्लोष
सोलापूर : पुणे पदवीधर मतदारसंघाच्या निवडणुकीत राष्ट्रवादी
काँग्रेस (शरदचंद्र पवार) पक्षाच्या उमेदवार हर्षदा देशमुख-जाधव यांनी मतमोजणीच्या
२१ व्या बाद फेरीअखेर ८ हजार ८५२ मतांची आघाडी घेतली. या आघाडीची माहिती मिळताच
सोलापुरातील पक्षाच्या पदाधिकारी आणि कार्यकर्त्यांनी जल्लोष केला.
कार्यकर्त्यांनी एकमेकांना लाडू भरवून आनंद व्यक्त केला. यावेळी राष्ट्रवादी
काँग्रेसचे शहराध्यक्ष महेश गादेकर, भारत जाधव, प्रशांत
बाबर, चंद्रकांत पवार, सरफराज शेख,
राकेश सोनी यांच्यासह पक्षाचे पदाधिकारी आणि कार्यकर्ते उपस्थित
होते. हर्षदा देशमुख-जाधव यांची आघाडी कायम राहिल्याने कार्यकर्त्यांमध्ये
उत्साहाचे वातावरण निर्माण झाले. पुढील मतमोजणीतही ही आघाडी कायम राहील, अशी अपेक्षा उपस्थितांनी व्यक्त केली.
२१ व्या बाद फेरीअखेर ८,८५२ मतांची आघाडी
मतमोजणीच्या २१ व्या बाद फेरीअखेर हर्षदा देशमुख-जाधव
यांना १ लाख ११ हजार २७९ मते मिळाली आहेत. तर प्रतिस्पर्धी उमेदवार डॉ. स्मिता
योगेश जाधव यांना १ लाख २ हजार ४२७ मते मिळाली आहेत. त्यामुळे देशमुख-जाधव यांनी ८
हजार ८५२ मतांची आघाडी घेतली आहे. विजयासाठी आवश्यक असलेला १ लाख १३ हजार ९५
मतांचा कोटा पूर्ण करण्यासाठी देशमुख-जाधव यांना आणखी १ हजार ८१६ मतांची गरज
असल्याचे दिलेल्या आकडेवारीतून स्पष्ट होते.
पुढील पसंतीच्या मतमोजणीकडे लक्ष
पुणे पदवीधर मतदारसंघात प्रथम पसंतीच्या मतांची मोजणी पूर्ण झाली असली, तरी विजयासाठी आवश्यक मतांचा कोटा कोणत्याही उमेदवाराने पूर्ण केलेला नसल्याने पुढील पसंतीच्या मतांची मोजणी सुरू आहे. त्यामुळे अंतिम निकालासाठी ही प्रक्रिया महत्त्वाची ठरणार आहे. हर्षदा देशमुख-जाधव यांची आघाडी आणि विजयाचा कोटा पूर्ण करण्यासाठी आवश्यक असलेली मतांची संख्या यामुळे सोलापुरातील राष्ट्रवादी काँग्रेसच्या कार्यकर्त्यांचे लक्ष पुढील मतमोजणीकडे लागले आहे. अधिकृत निकाल जाहीर होण्यापूर्वीच आघाडीच्या पार्श्वभूमीवर शहरात आनंदोत्सवाचे वातावरण पाहायला मिळाले.
Warning: Undefined variable $AdImage in /home/dailysanchar/public_html/NewsDetails.php on line 216