श्री मार्कंडेय महामुनी रथोत्सवासाठी महापालिका सज्ज; मिरवणूक मार्गावरील सर्व अडथळे तातडीने दूर करा – महापौर विनायक कोंड्याल
सोलापूर : पद्मशाली समाजाचे कुलदैवत श्री मार्कंडेय महामुनी
यांच्या रथोत्सवानिमित्त सोलापूर शहरातून निघणाऱ्या भव्य मिरवणुकीच्या
पार्श्वभूमीवर महापौर कार्यालयात आढावा बैठक घेण्यात आली. महापौर विनायक कोंड्याल
यांच्या अध्यक्षतेखाली झालेल्या या बैठकीत रथोत्सवासाठी आवश्यक नागरी सुविधा, सुरक्षा व्यवस्था आणि मिरवणूक मार्गावरील उपाययोजनांचा
सविस्तर आढावा घेण्यात आला. बैठकीस उपमहापौर ज्ञानेश्वरी
देवकर, सभागृह नेते नरेंद्र काळे, स्थायी समिती सभापती रंजीता
चाकोते, शहराध्यक्ष तथा नगरसेविका रोहिणी तडवळकर, माजी महापौर कांचना यन्नम, अतिरिक्त आयुक्त संदीप कारंजे, नगर अभियंता नीलकंठ मठपती, पद्मशाली संस्थेचे अध्यक्ष सुरेश
फलमारी, उपाध्यक्ष महांकाली येलदी, सरचिटणीस संतोष सोमा, सहचिटणीस राज महेंद्र कमतम, रमेश कैरमकोंडा, युवक संघटनेचे अध्यक्ष हेमंत
कुमार साका, मुख्य अग्निशमन अधिकारी राकेश
साळुंखे, कार्यकारी अभियंता विद्युत राजेश परदेशी यांच्यासह
महापालिकेचे विविध विभागीय अधिकारी उपस्थित होते.
मिरवणूक मार्गाची सविस्तर माहिती
बैठकीदरम्यान पद्मशाली संस्थेचे
अध्यक्ष सुरेश फलमारी यांनी श्री मार्कंडेय महामुनी रथोत्सवानिमित्त काढण्यात
येणाऱ्या मिरवणुकीची सविस्तर माहिती महापौर, पदाधिकारी आणि अधिकाऱ्यांना
दिली. मिरवणूक मार्गावरील रस्त्यांची
दुरुस्ती, ठिकठिकाणी असलेले खड्डे बुजविणे, वाहतुकीस अडथळा ठरणारे अडथळे दूर करणे, झाडांच्या वाढलेल्या फांद्या छाटणे, ड्रेनेज लाईनची आवश्यक कामे करणे तसेच विद्युत आणि
अग्निशमन विभागाशी संबंधित आवश्यक उपाययोजना करण्याची मागणी यावेळी करण्यात आली. रथोत्सवाच्या मिरवणुकीत मोठ्या संख्येने भाविक आणि
नागरिक सहभागी होत असल्याने मिरवणूक मार्ग सुरक्षित आणि अडथळामुक्त असणे आवश्यक
आहे. त्यादृष्टीने रस्ते, विद्युत व्यवस्था, स्वच्छता, ड्रेनेज, अग्निशमन व्यवस्था आणि इतर नागरी सुविधांचा समन्वयाने
आढावा घेण्यात आला.
‘महापालिका पूर्णपणे कटिबद्ध’
महापौर विनायक कोंड्याल म्हणाले, “श्री मार्कंडेय महामुनी रथोत्सव हा पद्मशाली समाजाच्या
श्रद्धेचा आणि सोलापूरच्या सांस्कृतिक परंपरेचा महत्त्वाचा उत्सव आहे. या
रथोत्सवाची मिरवणूक सुरळीत, सुरक्षित आणि उत्साहपूर्ण
वातावरणात पार पडावी, यासाठी सोलापूर महानगरपालिका
पूर्णपणे कटिबद्ध आहे. मिरवणूक मार्गावरील सर्व आवश्यक नागरी सुविधा वेळेत उपलब्ध
करून देण्यात येतील.” महापौरांनी संबंधित विभागाच्या
अधिकाऱ्यांना मिरवणूक मार्गाची प्रत्यक्ष पाहणी करण्याच्या सूचना दिल्या.
रस्त्यांवरील खड्डे, अडथळे, झाडांच्या फांद्या, ड्रेनेजच्या समस्या तसेच विद्युत
व्यवस्थेशी संबंधित बाबी तातडीने मार्गी लावण्याचे निर्देश त्यांनी दिले. कोणत्याही प्रकारचा अडथळा किंवा गैरसोय निर्माण होऊ नये, यासाठी सर्व विभागांनी परस्पर समन्वयाने काम करावे, असेही महापौरांनी स्पष्ट केले.
सुरक्षा आणि वाहतूक व्यवस्थेला
प्राधान्य
महापालिकेच्या वतीने
रथोत्सवासाठी आवश्यक सर्व सोयी-सुविधा उपलब्ध करून देतानाच नागरिकांची सुरक्षितता, वाहतूक व्यवस्था आणि मिरवणुकीचे नियोजन यांना सर्वोच्च
प्राधान्य दिले जाणार असल्याचे महापौरांनी सांगितले. सभागृह नेते नरेंद्र काळे आणि शहराध्यक्ष तथा नगरसेविका
रोहिणी तडवळकर यांनीही रथोत्सवाच्या यशस्वी आयोजनासाठी महापालिका प्रशासन, पद्मशाली समाजाच्या संस्था आणि संबंधित विभागांनी
समन्वयाने काम करण्याची गरज व्यक्त केली. रथोत्सवाची परंपरा तसेच त्याचे
धार्मिक आणि सामाजिक महत्त्व लक्षात घेऊन प्रशासनाने आवश्यक त्या सर्व उपाययोजना
कराव्यात, अशी अपेक्षाही त्यांनी व्यक्त केली. या आढावा बैठकीमुळे रथोत्सवाच्या नियोजनाला गती मिळाली
असून संबंधित सर्व विभागांना आवश्यक सूचना देण्यात आल्या आहेत. त्यामुळे श्री
मार्कंडेय महामुनी रथोत्सवाची मिरवणूक सुरक्षित, शिस्तबद्ध आणि उत्साहपूर्ण
वातावरणात पार पाडण्यासाठी सोलापूर महापालिका प्रशासन सज्ज असल्याचे स्पष्ट झाले.
