मद्य घोटाळा प्रकरणात अरविंद केजरीवाल निर्दोष; कोर्टाच्या निर्णयानंतर भावुक

दिल्लीतील कथित मद्य घोटाळा प्रकरणात मोठी घडामोड घडली असून अरविंद केजरीवाल यांच्यासह इतर आरोपींना कोर्टाने निर्दोष मुक्त केले आहे. राऊस अव्हेन्यू न्यायालय यांच्या निर्णयानंतर केजरीवाल प्रसारमाध्यमांसमोर भावुक झाले आणि त्यांना अश्रू अनावर झाले. निर्णयानंतर बोलताना केजरीवाल यांनी नरेंद्र  मोदी  आणि अमित शाह  यांच्यावर गंभीर आरोप केले. “आमच्याविरोधात खोटं प्रकरण तयार करण्यात आलं. आम आदमी पक्ष संपवण्यासाठी हे सर्वात मोठं राजकीय षडयंत्र होतं,” असा आरोप त्यांनी केला. मद्य धोरणाशी संबंधित कथित गैरव्यवहार प्रकरणात अंमलबजावणी संचालनालयाने (ईडी) केजरीवाल यांना अटक केली होती. काही काळ त्यांनी तुरुंगातूनच मुख्यमंत्रिपदाचा कारभार सांभाळला; मात्र नंतर त्यांना पदाचा राजीनामा द्यावा लागला. या प्रकरणामुळे दिल्लीच्या राजकारणात मोठी खळबळ उडाली होती. त्यानंतर झालेल्या विधानसभा निवडणुकीत आम आदमी पार्टी  ला पराभवाचा सामना करावा लागला. आता कोर्टाने केजरीवाल, माजी उपमुख्यमंत्री मनीष सिसोडिया  यांच्यासह अन्य आरोपींची निर्दोष मुक्तता केल्याने राजकीय वर्तुळात नव्या चर्चांना उधाण आले आहे.