सोलापुरात टायपिंग परीक्षेतील तांत्रिक गोंधळाविरोधात प्रणिती शिंदेंचे आंदोलन; चारही सत्रांच्या परीक्षा रद्द
सोलापूर : महाराष्ट्र शासनाच्या कॉम्प्युटर टायपिंग बेसिक कोर्स (GCC-TBC)
ऑक्टोबर २०२६ परीक्षेदरम्यान सोलापुरातील परम इन्फोटेक, नागेश करजगी स्कूल परीक्षा केंद्रावर कॉम्प्युटर बिघाड आणि सर्व्हर
डाऊनमुळे गोंधळ निर्माण झाला. या तांत्रिक अडचणींमुळे सुमारे ३०० ते ४००
विद्यार्थ्यांचे नुकसान होण्याची शक्यता निर्माण झाली होती. विद्यार्थ्यांनी
खासदार प्रणिती शिंदे यांच्याशी संपर्क साधल्यानंतर त्यांनी तातडीने परीक्षा
केंद्रावर धाव घेत आंदोलनाचा पवित्रा घेतला. त्यानंतर दिवसभरातील चारही सत्रांच्या
परीक्षा रद्द करण्याचा निर्णय घेण्यात आला. १५ ऑक्टोबर रोजी सकाळी ९ वाजता सुरू
होणाऱ्या कॉम्प्युटर टायपिंग परीक्षेत तांत्रिक अडचणी आल्याने विद्यार्थी घाबरून
गेले होते. या प्रकाराची माहिती मिळताच खासदार प्रणिती शिंदे यांनी सोलापूरचे
माध्यमिक शिक्षणाधिकारी सचिन जगताप यांच्याशी संपर्क साधून त्यांना परीक्षा
केंद्रावर बोलावले. तसेच महाराष्ट्र राज्य शिक्षण परिषद अध्यक्ष नंदकुमार बेडासे
यांच्याशी दूरध्वनीवरून चर्चा करून विद्यार्थ्यांच्या समस्या मांडल्या.
परीक्षा रद्द करून नव्या तारखेची मागणी
तांत्रिक अडचणींमुळे १५ ऑक्टोबर रोजी घेण्यात आलेली
परीक्षा रद्द करून शासनाचा सर्व्हर पूर्णपणे सुरळीत आणि कार्यक्षम झाल्यानंतरच
पुनर्परीक्षेची तारीख जाहीर करावी, अशी मागणी प्रणिती शिंदे यांनी केली.
विद्यार्थ्यांना परीक्षा देण्यासाठी अनावश्यक प्रवास करावा लागू नये, तसेच त्यांचा वेळ आणि आर्थिक खर्च वाचावा यासाठी शक्यतो प्रत्येक
तालुक्यात परीक्षा केंद्र उपलब्ध करून द्यावे, अशीही मागणी
त्यांनी केली. तांत्रिक कारणांमुळे परीक्षा रद्द झाल्यास विद्यार्थ्यांकडून पुन्हा
परीक्षा शुल्क आकारू नये, अशी भूमिका त्यांनी मांडली.
पुनर्परीक्षेसाठी निवडण्यात येणाऱ्या केंद्रांवर संगणक, इंटरनेट,
वीजपुरवठा आणि आवश्यक तांत्रिक यंत्रणेसह मूलभूत सुविधा उपलब्ध
असाव्यात. परीक्षा सुरू होण्यापूर्वी सर्व्हर आणि संबंधित तांत्रिक यंत्रणेची
तपासणी करून परीक्षा सुरळीत पार पडेल, याची दक्षता घ्यावी,
अशी मागणीही करण्यात आली. अन्यथा आंदोलन करण्याचा इशारा प्रणिती
शिंदे यांनी दिला.
चारही सत्रांच्या परीक्षा रद्द; नव्या केंद्रांबाबत ग्वाही
विद्यार्थ्यांच्या समस्यांची दखल घेत माध्यमिक
शिक्षणाधिकारी सचिन जगताप यांनी १५ ऑक्टोबर रोजी दिवसभरातील चारही सत्रांच्या
परीक्षा रद्द करून पुनर्परीक्षेची तारीख नंतर कळविण्यात येईल, अशी ग्वाही दिली. तसेच नागेश करजगी स्कूल, सोलापूर
येथील परीक्षा केंद्र रद्द करून पंढरपूर आणि सिंहगड महाविद्यालय, सोलापूर येथे परीक्षा केंद्र उपलब्ध करून देण्याबाबतही ग्वाही देण्यात
आल्याची माहिती देण्यात आली. या वेळी सोलापूर युवक काँग्रेसचे अध्यक्ष गणेश डोंगरे,
महेंद्र शिंदे, अनंत म्हेत्रे, हनुमंत जावीर, सचिन पवार, महेश
लोंढे, यासीन शेख, सूर्या शेट्टीयार,
धीरज खंदारे, दिनेश डोंगरे, शशिकांत शेळके, आकाश जांभळे, योगेश
रणधिरे आदी उपस्थित होते.
पुनर्परीक्षेची अधिकृत तारीख आणि केंद्रांची अंतिम यादी
जाहीर झाल्यानंतर विद्यार्थ्यांनी संबंधित अधिकृत सूचनांनुसार पुढील नियोजन करावे.
