नाशिक TCS धर्मांतर प्रकरणात इम्तियाज जलील यांचे नाव; मतीन पटेलच्या फोनमधील रेकॉर्डिंगची पोलिसांकडून तपासणी
नाशिकमधील टाटा कन्सल्टन्सी सर्व्हिसेस (TCS) कंपनीतील कथित धर्मांतर आणि लैंगिक शोषण प्रकरणात नवी घडामोड समोर आली
आहे. या प्रकरणातील आरोपी निदा खान हिला आश्रय दिल्याच्या आरोपावरून एमआयएमचे नेते
इम्तियाज जलील यांचे नाव तपासात समोर आले असून, त्यांच्याविरोधात
गुन्हा दाखल झाल्याचे वृत्त आहे. माजी नगरसेवक मतीन पटेल याच्या मोबाईलमधील कॉल
रेकॉर्डिंगमुळे तपासाला नवे वळण मिळाल्याचा दावा पोलिस सूत्रांकडून करण्यात येत
आहे.
मतीन पटेलच्या मोबाईलमधील कॉल रेकॉर्डिंगची तपासणी
या प्रकरणात यापूर्वी एमआयएमचे माजी नगरसेवक मतीन पटेल
याच्याविरोधात गुन्हा दाखल करण्यात आला होता. तपासादरम्यान पोलिसांनी त्याचा
मोबाईल जप्त केला. या मोबाईलमध्ये काही कॉल रेकॉर्डिंग आढळल्याचे वृत्त आहे. या
रेकॉर्डिंगच्या तपासादरम्यान इम्तियाज जलील यांचे नाव समोर आल्याचा दावा केला जात
आहे. त्यानंतर पोलिसांनी जलील यांचे आवाजाचे नमुने घेतल्याची माहिती आहे. या
प्रकरणात जलील यांच्याविरोधात महत्त्वाचे पुरावे मिळाल्याचा दावा पोलीस सूत्रांनी
केला आहे. मात्र, या रेकॉर्डिंगमधील संभाषणाचा अधिकृत
तपशील अद्याप समोर आलेला नाही.
प्रकरणाच्या तपासासाठी विशेष तपास पथकाची स्थापना
नाशिक पोलिसांनी या प्रकरणाचा सखोल तपास करण्यासाठी विशेष
तपास पथकाची (SIT) स्थापना केली आहे. निदा खान हिला
लपवून ठेवण्यात इम्तियाज जलील यांचा सहभाग असल्याचा संशय तपास यंत्रणेकडून व्यक्त
करण्यात आला आहे. या संदर्भात SITने न्यायालयात माहिती सादर
केल्याचे वृत्त आहे. या प्रकरणात जलील यांच्याशी संबंधित आरोपांची चौकशी आणि पुढील
कायदेशीर प्रक्रिया सुरू असल्याचे सांगण्यात येत आहे.
इम्तियाज जलील यांनी काय प्रतिक्रिया दिली?
या प्रकरणावर इम्तियाज जलील यांची प्रतिक्रिया जाणून
घेण्याचा प्रयत्न करण्यात आला. मात्र, त्यांनी सविस्तर प्रतिक्रिया देणे टाळले.
‘मी स्वतः आता माहिती मागवली आहे. त्यानंतर सर्वांना प्रतिक्रिया देणार आहे,’
असे त्यांनी स्पष्ट केल्याचे वृत्त आहे. त्यामुळे या प्रकरणातील
आरोपांबाबत जलील यांची सविस्तर भूमिका काय असेल, याकडे लक्ष
लागले आहे.
निदा खान ४० दिवसांनंतर छत्रपती संभाजीनगरमधून अटकेत
TCS प्रकरणात गुन्हा दाखल झाल्यानंतर निदा
खान फरार झाली होती. तपासादरम्यान ती छत्रपती संभाजीनगरमध्ये असल्याची माहिती
पोलिसांना मिळाली. फरार काळात ती तिच्या मावशीच्या संपर्कात होती, तर मावशीचा संपर्क मतीन पटेलशी असल्याचे तपासात समोर आल्याचे वृत्त आहे. मतीन
पटेल मावशीकडून निदा खानबाबत माहिती घेत असल्याचा पोलिसांचा संशय होता. अखेर
सुमारे ४० दिवसांपासून फरार असलेल्या निदा खानला छत्रपती संभाजीनगरमधील नारेगाव
परिसरातून अटक करण्यात आली. अटकेच्या वेळी ती एका घरात आई-वडील, मावशी आणि अन्य एका व्यक्तीसोबत राहत असल्याची माहिती आहे.
न्यायालयीन आदेशात धर्मांतराच्या प्रयत्नाचा उल्लेख
या प्रकरणातील न्यायालयीन आदेशात प्राथमिक चौकशीच्या
आधारे काही निरीक्षणे नोंदवण्यात आल्याचे वृत्त आहे. निदा खानने इतर सहआरोपींसोबत
मिळून पीडितेवर मानसिक प्रभाव टाकण्याचा प्रयत्न केल्याचा उल्लेख त्यात असल्याचे
सांगितले जाते. पीडितेचा विश्वास संपादन करून तिची विचारसरणी आणि धर्म बदलण्याचा
प्रयत्न झाल्याचा आरोप एफआयआरमध्ये नमूद आहे. या प्रकरणात लैंगिक छळ आणि कथित
धर्मांतराच्या आरोपांची चौकशी सुरू आहे. या प्रकरणातील सर्व आरोपांची सत्यता
न्यायालयीन प्रक्रियेत स्पष्ट होणार असून, तपास यंत्रणांकडून पुरावे आणि संबंधित
व्यक्तींच्या भूमिकेची पडताळणी केली जात आहे.
