अक्कलकोटमध्ये उसाच्या शेतात १ कोटींचा गांजा जप्त; शेतकऱ्यासह तिघांना अटक, दोघे फरार
अक्कलकोट : सोलापूर जिल्ह्यातील अक्कलकोट तालुक्यातील आळगे गावच्या
हद्दीत उसाच्या शेतात गांजाची लागवड आढळून आल्याने खळबळ उडाली आहे. पोलिसांनी
कारवाई करत गांजाची २४० झाडे जप्त केली असून, त्यांचे एकूण वजन २११ किलो ९०० ग्रॅम
असल्याची माहिती आहे. जप्त केलेल्या गांजाची किंमत सुमारे १ कोटी ५ लाख रुपये
असल्याचे पोलिसांनी सांगितले. या प्रकरणात शेगाव येथील मलप्पा गुरबाळप्पा गड्डी
ऊर्फ बिराजदार (वय ६०) आणि त्यांची मुले सिद्धाराम बिराजदार (वय ३९) व श्रीकांत
बिराजदार (वय ३०) यांना अटक करण्यात आल्याची माहिती पोलीस अधीक्षक अतुल कुलकर्णी
यांनी पत्रकार परिषदेत दिली. या प्रकरणात एकूण पाच जणांविरुद्ध गुन्हा दाखल
करण्यात आला असून, अन्य दोघे फरार असल्याचे सांगण्यात आले.
उसाच्या शेतात गांजाची २४० झाडे
शेगाव येथील मलप्पा गड्डी ऊर्फ बिराजदार यांच्या आळगे
गावच्या हद्दीतील शेतात गांजाची लागवड असल्याची माहिती पोलिसांना मिळाली होती.
त्यानंतर अक्कलकोट दक्षिण पोलीस ठाण्याचे पोलीस निरीक्षक विनोद घुगे यांच्या
नेतृत्वाखालील पथकाने कारवाई केली. पोलिसांना उसाच्या शेतात सुमारे १२ फूट उंचीची
गांजाची २४० झाडे आढळली. त्यापैकी २१० झाडे जिवंत, तर ३० झाडे वाळलेली होती. या झाडांचे
एकूण वजन २११ किलो ९०० ग्रॅम असल्याचे पोलिसांनी नमूद केले. पोलिसांनी गांजा जप्त
करून पुढील तपास सुरू केला आहे.
शेतकऱ्याचा दावा : उसतोड कामगारांमुळे बिया पडल्या
पोलिसांच्या चौकशीदरम्यान शेतकरी मलप्पा बिराजदार याने
वेगळा दावा केल्याचे वृत्त आहे. मागील वर्षी ऊसतोडीसाठी आलेल्या काही कामगारांनी
गांजा ओढला होता. त्यावेळी गांजाच्या बिया शेतात पडल्या आणि त्यातून झाडे उगवली, याची आपल्याला माहिती नव्हती, असे त्याने
सांगितल्याचे नमूद करण्यात आले आहे. मात्र, शेतात गांजाची
जाणीवपूर्वक लागवड करण्यात आल्याचा आरोप पोलिसांनी केला आहे. शेतकऱ्याचा दावा आणि
पोलिसांचा आरोप याबाबतचा अंतिम निष्कर्ष तपासातून स्पष्ट होईल.
पाच जणांविरुद्ध गुन्हा; दोघांचा शोध सुरू
या प्रकरणात एकूण पाच जणांविरुद्ध गुन्हा दाखल करण्यात
आला आहे. अटक केलेल्या तिघांना मदत केल्याचा संशय असलेले अन्य दोन नातेवाईक फरार
असून, पोलिस त्यांचा शोध घेत आहेत. या कारवाईत पोलीस उपअधीक्षक राजेंद्र टाकणे,
पोलीस निरीक्षक विनोद घुगे, अविनाश पवार,
सहाय्यक पोलीस निरीक्षक राहुल डोंगरे, अमोल
माने, मिलिंद मिठ्ठापल्ली आदी सहभागी होते.
व्यसनांपासून दूर राहण्याचे पोलिसांचे आवाहन
या प्रकरणाच्या पार्श्वभूमीवर पोलीस अधीक्षक अतुल
कुलकर्णी यांनी तरुणांनी व्यसनांपासून दूर राहावे, असे आवाहन केले. गांजाच्या लागवडीमागील
नेमकी परिस्थिती, संबंधित व्यक्तींची भूमिका आणि या
प्रकरणातील इतर बाबींचा तपास पोलिसांकडून सुरू आहे.
