माउंट एव्हरेस्ट परिसरात दोन हेलिकॉप्टरची धडक; परदेशी पर्यटकाचा मृत्यू, पायलट जखमी
नेपाळ : जगातील सर्वोच्च शिखर माउंट एव्हरेस्ट परिसरात मंगळवारी सकाळी दोन हेलिकॉप्टरची धडक होऊन भीषण अपघात झाला. नेपाळमधील सोलुखुंबू जिल्ह्यातील फेरिचे येथे घडलेल्या या दुर्घटनेनंतर दोन्ही हेलिकॉप्टर जमिनीवर कोसळले. या अपघातात एका परदेशी पर्यटकाचा मृत्यू झाला असून एक पायलट जखमी झाला आहे. घटनेनंतर परिसरात बचावकार्य सुरू करण्यात आले आहे. माउंट एव्हरेस्ट परिसरात पर्यटक आणि गिर्यारोहकांची ने-आण करण्यासाठी हेलिकॉप्टरचा मोठ्या प्रमाणावर वापर केला जातो. मंगळवारी सकाळी दोन हेलिकॉप्टर फेरिचे येथील हेलिपॅडवर उतरण्याच्या तयारीत असताना त्यांची एकमेकांना धडक झाली. त्यानंतर दोन्ही हेलिकॉप्टर कोसळले.
फिशटेल एअर आणि एअर डायनेस्टीच्या हेलिकॉप्टरचा समावेश
अधिकाऱ्यांनी दिलेल्या माहितीनुसार, या अपघातात फिशटेल एअर आणि एअर डायनेस्टी या दोन कंपन्यांच्या हेलिकॉप्टरचा समावेश होता. फिशटेल एअरच्या हेलिकॉप्टरमधून प्रवास करणाऱ्या एका परदेशी पर्यटकाचा घटनास्थळी मृत्यू झाला. मृत पर्यटकाची ओळख अद्याप पटलेली नाही. फिशटेल एअरचे हेलिकॉप्टर कॅप्टन प्रज्ज्वल केसी चालवत होते, तर एअर डायनेस्टीच्या हेलिकॉप्टरची जबाबदारी कॅप्टन रवींद्र प्रजापती यांच्याकडे होती. या दुर्घटनेत कॅप्टन रवींद्र प्रजापती जखमी झाले असून त्यांना उपचारासाठी रुग्णालयात दाखल करण्यात आले आहे.
बचावकार्य सुरू; अपघाताचा तपास
अपघाताची माहिती मिळताच बचाव पथक घटनास्थळी दाखल झाले. सिमरिक एअरचे एक हेलिकॉप्टरही मदतीसाठी घटनास्थळी पोहोचले. जखमींना मदत करण्यासह अपघातग्रस्त परिसरात बचावकार्य सुरू करण्यात आले. दरम्यान, दोन्ही हेलिकॉप्टरची धडक नेमकी कोणत्या कारणामुळे झाली, हे अद्याप स्पष्ट झालेले नाही. हेलिपॅडवर उतरण्याच्या वेळी दोन्ही हेलिकॉप्टर एकाच वेळी जवळ आल्याने हा अपघात झाला का, याचा तपास अधिकारी करत आहेत. माउंट एव्हरेस्ट परिसरात दरवर्षी हजारो पर्यटक आणि गिर्यारोहक येतात. त्यामुळे या भागात हेलिकॉप्टर वाहतूक महत्त्वाची मानली जाते. या दुर्घटनेमुळे डोंगराळ आणि बर्फाच्छादित भागातील हेलिकॉप्टर प्रवासाच्या सुरक्षिततेचा प्रश्न पुन्हा चर्चेत आला आहे.
