छेडछाडीला विरोध केल्याने तरुणीला लोकलमधून रेल्वे रुळांवर ढकलले; डावा हात गमावला
मुंबई : लोकल ट्रेनमध्ये छेडछाडीला विरोध केल्याने एका तरुणीला थेट
रेल्वे रुळांवर ढकलल्याची धक्कादायक घटना मिरा-भाईंदर परिसरात घडली आहे. ४
नोव्हेंबर रोजी बोरिवलीहून विरारच्या दिशेने जाणाऱ्या लोकलमध्ये हा प्रकार घडला.
या हल्ल्यात तरुणीचा डावा हात रेल्वेच्या चाकाखाली आल्याने कोपरापासून कापावा
लागला, तर
डोक्यालाही गंभीर दुखापत झाली. या प्रकरणी भाईंदर रेल्वे पोलिसांनी आरोपीला अटक
केली आहे.
छेडछाडीला विरोध केल्याने वाद
पीडित तरुणी बोरिवलीहून नायगावच्या दिशेने लोकलने प्रवास करत होती.
नायगाव स्थानक जवळ येत असताना डब्यातील एका व्यक्तीने तिच्या छातीजवळ अयोग्य
पद्धतीने स्पर्श केल्याचा आरोप आहे. तरुणीने याला विरोध केला आणि संबंधित
व्यक्तीला चपलेने मारले. त्यानंतर दोघांमध्ये वाद झाला. लोकल नायगाव स्थानकात
थांबली असताना आरोपीने तरुणीला जोरात धक्का दिला. त्यामुळे ती दोन डब्यांच्या मधून
रेल्वे रुळांवर पडली. ती पुन्हा फलाटावर चढण्याचा प्रयत्न करत असतानाच लोकल सुरू
झाली आणि तिचा डावा हात रेल्वेच्या चाकाखाली आला. या गंभीर दुखापतीमुळे तिचा हात
कोपरापासून कापावा लागला. डोक्याला झालेल्या दुखापतीवर १६ टाके घालण्यात आल्याचे
वृत्तात म्हटले आहे.
‘मला फक्त न्याय हवा आहे’
या घटनेबाबत पीडित तरुणीने सांगितले की, संबंधित व्यक्तीने तिच्याशी गैरवर्तन केले. तिने
विरोध केल्यानंतर त्याने शिवीगाळ आणि मारहाण केली. त्यानंतर तिला रेल्वे रुळांवर
ढकलून दिले. या घटनेमुळे तिचे आयुष्य बदलून गेले असून, आता
आपल्याला न्याय मिळावा आणि आरोपीला कठोर शिक्षा व्हावी, अशी
मागणी तिने केली आहे.
गुन्ह्यात गंभीर कलमे वाढवण्याची मागणी
या प्रकरणी ६ नोव्हेंबर रोजी भाईंदर रेल्वे पोलीस ठाण्यात गुन्हा दाखल
करण्यात आला. सुरुवातीला भारतीय न्यायसंहितेच्या कलम ७४, ११७(२)
आणि ३५२ अंतर्गत गुन्हा नोंदवण्यात आल्याचे वृत्तात नमूद आहे. मात्र, हत्येचा प्रयत्न केल्यासंदर्भातील कलम १०९ लागू न केल्याबद्दल पीडित
कुटुंबीयांनी नाराजी व्यक्त केली. मनसेच्या पदाधिकाऱ्यांनी रेल्वे पोलिसांच्या
वरिष्ठ अधिकाऱ्यांची भेट घेऊन गुन्ह्यात योग्य ती गंभीर कलमे समाविष्ट करण्याची
मागणी केली. त्यानंतर कलम १०९ समाविष्ट करण्याबाबत न्यायालयात पत्र देण्याचे
आश्वासन पोलिसांनी दिल्याचे वृत्तात म्हटले आहे. या घटनेमुळे मुंबई उपनगरीय रेल्वे
प्रवासातील महिलांच्या सुरक्षिततेचा प्रश्न पुन्हा ऐरणीवर आला आहे.
