नागपुरात नाल्यात आढळला सहा महिन्यांच्या बाळाचा मृतदेह; जवळ लाल रंगाची बॅग, पोलिसांकडून CCTV तपासणी
नागपुरात नाल्यात बाळाचा मृतदेह आढळल्याने खळबळ
नागपूर : शहरातील पाचपावली पोलीस ठाण्याच्या हद्दीतील विणकर कॉलनी
परिसरात माणुसकीला काळिमा फासणारी घटना उघडकीस आली आहे. येथील एका नाल्यात सुमारे
सहा महिन्यांच्या बाळाचा मृतदेह आढळून आला. विशेष म्हणजे, मृतदेहाजवळ
लाल रंगाची एक बॅगही आढळल्याने या प्रकरणाचे गूढ वाढले आहे. बुधवारी दुपारच्या
सुमारास स्थानिक नागरिकांच्या निदर्शनास नाल्यात मृतदेह पडलेला आला. सुरुवातीला
नेमके काय आहे, हे नागरिकांना समजले नाही. मात्र, जवळ जाऊन पाहणी केली असता बाळाचा मृतदेह असल्याचे स्पष्ट झाले. मृतदेहाजवळ
लाल रंगाची बॅगही पडलेली होती. या घटनेची माहिती परिसरात पसरताच नागरिकांनी
घटनास्थळी गर्दी केली. मृतदेहाजवळ भटक्या कुत्र्यांचा वावर असल्याचेही वृत्तात
नमूद करण्यात आले आहे.
लाल बॅगेचे गूढ कायम
नागरिकांनी तत्काळ पाचपावली पोलिसांना घटनेची माहिती दिली. पोलिसांचे
पथक घटनास्थळी दाखल झाले. घटनेचे गांभीर्य लक्षात घेऊन फॉरेन्सिक पथकालाही पाचारण
करण्यात आले. पथकाने घटनास्थळाची पाहणी करून आवश्यक पुरावे गोळा केले. बाळाचा
मृतदेह ताब्यात घेऊन पुढील वैद्यकीय तपासणीसाठी पाठविण्याची प्रक्रिया करण्यात
आली. अज्ञात व्यक्तीने लाल रंगाच्या बॅगेतून मृतदेह आणून नाल्यात टाकला असावा, असा
प्राथमिक संशय व्यक्त केला जात आहे. मात्र, बॅगेचा आणि
मृतदेहाचा नेमका संबंध काय, हे अद्याप स्पष्ट झालेले नाही.
CCTV फुटेजच्या आधारे संशयिताचा शोध
या घटनेमागील व्यक्तीचा शोध घेण्यासाठी पोलिसांनी विणकर कॉलनी आणि
परिसरातील CCTV कॅमेऱ्यांचे फुटेज तपासण्यास सुरुवात केली आहे.
नाल्याच्या आसपासच्या रस्त्यांवरून ये-जा करणाऱ्या व्यक्तींच्या हालचालींची माहिती
घेतली जात आहे. लाल रंगाची बॅग घेऊन संशयास्पदरीत्या फिरणारी व्यक्ती कोणाच्या
निदर्शनास आली होती का, याचीही पोलिसांकडून चौकशी सुरू आहे.
स्थानिक नागरिकांकडून माहिती घेतली जात असून, उपलब्ध
पुराव्यांच्या आधारे तपास पुढे नेण्यात येत आहे.
बाळाची ओळख आणि मृत्यूचे कारण अद्याप अस्पष्ट
नाल्यात आढळलेल्या बाळाची ओळख काय, मृतदेह तेथे कोणी आणून टाकला आणि या घटनेमागील कारण
काय, असे अनेक प्रश्न उपस्थित झाले आहेत. वैद्यकीय तपासणीतून
मृत्यूचे कारण स्पष्ट होण्याची अपेक्षा आहे. सध्या पाचपावली पोलीस या प्रकरणाचा
पुढील तपास करीत आहेत.
