सोलापूरच्या एसी सिटी बस प्रवाशांची गैरसोय; शिवाजी महाराज चौकात बस स्टॉप उभारण्याची मागणी
सोलापूर : शहरात महापालिकेच्या वतीने सुरू करण्यात आलेल्या एसी सिटी बस सेवेला
नागरिकांचा चांगला प्रतिसाद मिळत आहे. आरामदायी आणि स्वस्त प्रवासाची सुविधा
उपलब्ध झाल्याने अनेक नागरिक या सेवेचा लाभ घेत आहेत. मात्र, बस
थांब्यांवरील मूलभूत सुविधांचा अभाव आणि बेकायदेशीर पार्किंगमुळे प्रवाशांना
अडचणींचा सामना करावा लागत आहे.
शिवाजी महाराज चौकात बस स्टॉपच नाही
शहरातील महत्त्वाचे ठिकाण असलेल्या छत्रपती शिवाजी महाराज चौकात सिटी
बस थांबण्यासाठी स्वतंत्र बस स्टॉप नसल्याने प्रवाशांची गैरसोय होत आहे. बस कुठे
थांबणार आणि प्रवाशांनी नेमके कुठे उभे राहायचे, असा प्रश्न निर्माण झाला आहे. त्यामुळे या चौकात
तातडीने व्यवस्थित बस स्टॉप उभारण्याची मागणी होत आहे.
बसचे वेळापत्रक नसल्याने प्रवाशांना प्रतीक्षा
शहरातील विविध बस थांब्यांवर बसचे वेळापत्रक लावण्यात आलेले नसल्याने
प्रवाशांना बस येण्याची निश्चित वेळ समजत नाही. परिणामी, अनेकदा
प्रवाशांना बराच वेळ थांब्यावर ताटकळत उभे राहावे लागते. प्रत्येक बस स्टॉपवर बसचे
वेळापत्रक लावण्याची मागणीही नागरिकांकडून होत आहे.
लकी चौकातील बस स्टॉपवर दुचाकींचे अतिक्रमण
लकी चौक परिसरात बस स्टॉपसमोरच अनेक दुचाकी वाहने बेकायदेशीरपणे पार्क
केली जात असल्याची तक्रार आहे. त्यामुळे बस थांबवण्यासाठी जागा उपलब्ध होत नाही.
परिणामी, प्रवाशांना
रस्त्यावर उभे राहून बस पकडावी लागत आहे. या ठिकाणचे अडथळे दूर करून बेकायदेशीर
पार्किंग हटवण्याची मागणी होत आहे.
विजय पुकाळे यांची महापालिकेकडे मागणी
या समस्या तातडीने सोडवण्याची मागणी माजी परिवहन पक्षनेते विजय पुकाळे यांनी केली आहे. महापालिकेने चांगली बस सेवा सुरू केली असून, त्याबद्दल त्यांनी प्रशासनाचे अभिनंदन केले. मात्र, प्रवाशांना आवश्यक सुविधा उपलब्ध करून दिल्याशिवाय ही सेवा पूर्णपणे यशस्वी होणार नसल्याचे त्यांनी सांगितले. छत्रपती शिवाजी महाराज चौकात तातडीने बस स्टॉप उभारावा, सर्व बस थांब्यांवर वेळापत्रक लावावे आणि लकी चौकातील बेकायदेशीर पार्किंग हटवावे, अशी मागणी पुकाळे यांनी केली आहे. महापालिकेने या प्रश्नांकडे गांभीर्याने लक्ष देऊन प्रवाशांची गैरसोय दूर करावी, अशी अपेक्षाही त्यांनी व्यक्त केली.
